Viðskipti innlent

Þrír framkvæmdastjórar ráðnir hjá 365

Kolbeinn Tumi Daðason skrifar
Frá vinstri: Sigrún L. Sigurjónsdóttir, Gunnar Ingvi Þórisson og Jóhanna Margrét Gísladóttir.
Frá vinstri: Sigrún L. Sigurjónsdóttir, Gunnar Ingvi Þórisson og Jóhanna Margrét Gísladóttir.
Þrír starfsmenn 365 voru í dag ráðnir sem framkvæmdastjórar hjá fyrirtækinu. Gunnar Ingvi Þórisson verður framkvæmdastjóri fjarskipta- og tæknisviðs, Jóhanna Margrét Gísladóttir verður framkvæmdastjóri sjónvarpssviðs og Sigrún L. Sigurjónsdóttir verður framkvæmdastjóri fjármálasviðs. Öll hafa þau starfað hjá 365 um lengri eða skemmri tíma. Þetta kemur fram í tilkynningu frá fyrirtækinu.

„Ég er mjög ánægður með þessa niðurstöðu og sérstaklega vegna þess að með þessum ráðningum fjölgar konum enn í hópi stjórnenda hjá 365,“ segir Sævar Freyr Þráinsson, forstjóri 365. Hann segir að nú sé í raun bara verið að ráða í lausar stöður. Framundan sé skemmtilegur tími stefnumörkunar og skipulagsvinnu hjá félaginu. Henni eigi að ljúka í september.

Gunnar Ingvi Þórisson hefur víðtæka reynslu af rekstri upplýsingatæknikerfa. Hann var einn af aðaleigendum Sensa ehf., sat í stjórn félagsins frá 2002 til 2007 og starfsmaður hjá Sensa til loka árs 2012. Á þeim tíma vann hann við ráðgjöf og þjónustu fyrir mörg af stærri fyrirtækjum á Íslandi, þar á meðal flest fjarskiptafyrirtæki landsins. Gunnar er með mikla reynslu í öryggismálum og tækni sem snýr að internetveitum og gagnaverum (Data Center).

Gunnar vann á kjarnasviði Tæknivals frá 1997 til 2002, þar áður í forritaþróun hjá Hug 1995-1997.  Gunnar er kvæntur Lindu Björk Bjarnadóttur og á með henni þrjú börn.

Jóhanna Margrét Gísladóttir útskrifaðist með meistaragráðu í rekstrarverkfræði frá Duke háskóla í Bandaríkjunum í maí síðastliðnum og er einnig með BSc í rekstrarverkfræði frá Háskólanum í Reykjavík. Undanfarið hefur Jóhanna gegnt starfi rekstrarstjóra sjónvarpssviðs 365 en hún starfaði áður sem fréttamaður á fréttastofu Stöðvar 2 og verkefnastjóri á framleiðsludeild. Auk þess hefur Jóhanna unnið hjá Arion Banka og Straumi. Jóhanna er trúlofuð Ólafi Sigurgeirssyni meistaranema í heilbrigðisverkfræði.

Sigrún L. Sigurjónsdóttir er viðskiptafræðingur að mennt og útskrifaðist með MBA-póf frá Háskólanum í Reykjavík 2009. Sigrún hefur starfað hjá 365 frá ársbyrjun 2004, byrjaði sem rekstrarstjóri hjá Frétt ehf. og forstöðumaður innheimtusviðs hjá 365 hf. (áður Dagsbrún).

Hún var forstöðumaður fjárstýringar og greiðsluþjónustu hjá 365 og svo fjármálastjóri þar til um liðin áramót er hún tók við sölu- og þjónustusviði áskrifta hjá félaginu. Hún mun stýra því jafnhliða fjármálasviðinu enn um sinn. Sigrún er í sambúð með Valtý Birni Valtýssyni og á eitt barn.






Fleiri fréttir

Sjá meira


×