Lífið

Þarf ekki ofurkrafta til að bjarga lífi

Viktoría Hermannsdóttir skrifar
 Gunnhildur Sveinsdóttir er verkefnastjóri Skyndihjálpar Rauða kross Íslands
Gunnhildur Sveinsdóttir er verkefnastjóri Skyndihjálpar Rauða kross Íslands Vísir/Stefán
„Kjörorðið er að þú þarft ekki skikkju eða ofurkrafta til að bjarga mannslífi. Allir geta bjargað mannslífi og það þarf ekki ofurkrafta til þess,“ segir Gunnhildur Sveinsdóttir, verkefnastjóri Skyndihjálpar Rauða kross Íslands.

Í dag, laugardag, er alþjóðlegur dagur Skyndihjálpar. Alþjóðasamband landsfélaga Rauða krossins og Rauða hálfmánans standa að deginum með það að markmiði að styrkja vitund einstaklinga, fjölskyldna og samfélaga um mikilvægi skyndihjálparkunnáttu.

„Skyndihjálp er fyrir alla og allir geta lært,“ segir Gunnhildur.

Hún segir Íslendinga almennt vera mjög vel að sér í skyndihjálp og hafa milli 80-90% landsmanna einhvern tímann lært skyndihjálp. Það skiptir þó miklu máli að halda kunnáttunni við og lét Rauði krossinn til dæmis gera fjórar stuttmyndir til þess að minna fólk á hvað skyndihjálp er mikilvæg og ekki síður hve þarft það er að halda kunnáttunni við.

„Myndir voru frumsýndar í skemmtiþættinum sem við vorum með í síðustu viku á Stöð 2. Þetta eru flottar myndir um þau fjögur atriði sem við leggjum áherslu á núna á afmælisárinu,“ segir hún en Rauði krossinn á Íslandi fagnar 90 ára afmæli í ár.

Paramedic performing infant CPR. Model is team member of actual European first aid champions 2011/2012. skyndihjálp
Þessi fjögur atriði sem hún nefnir eru hvernig bregðast eigi rétt við bruna, blæðingu, aðskotahlut í hálsi og hvernig veita eigi endurlífgun. 

Áhersla afmælisársins er á skyndihjálp og hefur Rauði krossinn látið framleiða ýmiss konar efni til þess að kenna réttu handtökin sem koma sér vel ef skyndileg veikindi eða slys koma upp. 

Meðal annars hefur verið þróað sérstakt skyndihjálparapp sem Gunnhildur hvetur fólk til að hlaða niður í snjallsímana sína svo hægt sé að nota þegar á reynir. 

„Við erum að nýta okkur þessa miðla til þess að ná til fólks og það sé auðvelt að kynna sér þessa hluti,“ segir hún og hvetur fólk til þess að læra skyndihjálp eða viðhalda kunnáttunni. 

Þeir sem vilja kynna sér efnið betur geta gert það hér.






Fleiri fréttir

Sjá meira


×