Innlent

Þarf að sæta gæsluvarðhaldi vegna ofbeldis í garð sambýliskonu

Samúel Karl Ólason skrifar
Vísir/GETTY
Hæstiréttur hefur vísað frá gæsluvarðhaldsmáli þar sem kærufresturinn var runninn út þegar kæran barst. Maður sem situr í gæsluvarðhaldi þar sem hann er sakaður um frelsissviptingu, líkamsárás, hótanir, kynferðisbrot og stórfelldar ærumeiðingar gegn sambýliskonu sinni.

Í úrskurði Héraðsdóms Reykjavíkur frá 27. apríl segir að hann hafi haldið konunni á heimili þeirra í fjóra tíma þann 5. febrúar. Farið er nánar yfir ásakanirnar í úrskurði Hæstaréttar.

„Á meðan á frelsissviptingunni hafi staðið hafi ákærði veist að A og slegið hana ítrekað hnefahöggum í síðuna og höfuðið, rifið í hár hennar, tekið hana hálstaki og sparkað ítrekað í síðu hennar og fætur þar sem hún hafi legið á gólfinu. Ákærði hafi jafnframt skipað A að setjast í stól og sparkað stólnum svo undan henni svo hún hafi fallið í gólfið.“

Á meðan á þessu stóð er maðurinn sagður hafa ítrekað henni lífláti og komið í veg fyrir að hún kæmist út. Einu sinni reyndi hún að flýja en þá reif hann í hár konunnar og sló hana hnefahöggum. Þá neyddi hann konuna til að girða niður um sig og skoðaði hann kynfæri hennar og rass með vasaljósi. Auk þess tók hann mynd af kynfærum hennar og þvingaði hana til munnmaka og endaþarmsmaka.

Brotin sem maðurinn er ákærður fyrir geta varðað allt að 16 ára fangelsi. Fyrir héraðsdómi var farið fram á að með „hliðsjón af alvarleika sakarefnis og þess að ríkir almannahagsmunir standi til þess að menn gangi ekki lausir þegar svo stendur á sé þess krafist að ákærða verði gert að sæta gæsluvarðhaldi meðan mál hans sé til meðferðar hjá dómstólum.“

Héraðsdómur Reykjavíkur samþykkti það og var hann dæmdur í gæsluvarðhald til 25. maí.

Í kærunni til Hæstaréttar var þess krafist að úrskurðurinn yrði feldur úr gildi, en til vara að gæsluvarðhaldið yrði markað við „hinn skemmsta“ tíma.

Verjandi mannsins sendi dómara tölvubréf þann 2. maí þar sem niðurstaða héraðsdóms var kærð. Í niðurstöðu Hæstaréttar. Eins og áður segir var dómur héraðsdóms kveðinn upp þann 27. apríl og samkvæmt lögum er kærufresturinn þrír sólarhringar frá því að aðili fékk vitneskju um úrskurðinn. Málinu var því vísað frá.




Fleiri fréttir

Sjá meira


×