Þættir Stöðvar 2 sigursælir á Golden Globe

Spennuþáttaröðin Homeland hlaut Golden Globe verðlaunin í drama-flokknum og Claire Danes hlaut verðlaun sem besta leikkona í sama flokki. Þættirnir hafa slegið í gegn á Showtime-sjónvarpsstöðinni í Bandaríkjunum í vetur og sýningar þeirra hefjast á Stöð 2 í mars. Stöð 2 sýnir raunar fjóra af þeim fimm þáttum sem tilnefndir voru í drama-flokknum á Golden Globe en auk Homeland þá voru Boardwalk Empire, Game of Thrones, American Horror Story og Boss tilnefndir. Kelsey Grammer hlaut verðlaunin sem besti leikarinn í þessum flokki sjónvarpsþátta en hann leikur aðalhlutverkið í Boss. Modern Family var valinn bestur í flokki gamanþátta en þættirnir eru á dagskrá Stöðvar 2 á þriðjudagskvöldum. Þess má geta að allar þáttaraðirnar sem tilnefndar voru í flokki gamanþátta eru eða verða sýndar á Stöð 2 en hinar fjórar eru Glee, New Girl, Episodes, og Enlightened. Matt LeBlanc hlaut verðlaunin sem besti leikari í gamanþáttum fyrir frammistöðu sína í Episodes sem eru væntanlegir á Stöð 2 og Laura Dern hlaut verðlaunin sem besta leikkona í gamanþáttum fyrir leik sinn í Enlightened frá HBO en þeir verða einnig sýndir á Stöð 2. Þá voru veitt verðlaun fyrir míníseríur eða sjónvarpsmyndir og þar varð breski myndaflokkurinn Downton Abbey fyrir valinu. Besti leikari í þeim flokki var valinn Idris Elba úr bresku þáttunum Luther og besta leikkonan var valin Kate Winslet fyrir frammistöðu sína í míníseríunni Mildred Pierce, sem væntanleg er á Stöð 2. Verðlaunin fyrir aukahlutverk eru sameiginleg fyrir alla flokkana, gamanþætti, dramatíska þætti, míníseríur og sjónvarpsmyndir. Þau verðlaun hlutu Peter Dinklage, dvergurinn í Game of Thrones, og Jessica Lange í American Horror Story, nýrri spennuþrunginni þáttaröð sem hlotið hefur mikið lof vestanhafs en hún verður tekin til sýninga á Stöð 2 síðar á árinu.