Lífið

Teiknar fólk gegn vægu gjaldi

Gyða Lóa Ólafsdóttir skrifar
Ariana segir eftirspurnina vera meiri en hún bjóst við.
Ariana segir eftirspurnina vera meiri en hún bjóst við. Vísir/GVA
Ariana Katrín Katrínardóttir safnar fyrir námsferð til New York með því að teikna prófílmyndir fólks á Facebook.

Hún segir söfnunina hafa farið vel af stað. „Þetta er eiginlega meira en ég bjóst við. Er eiginlega bara komin í tvær vinnur eða er búin að vera síðustu daga,“ segir hún glöð í bragði.

Hún teiknar myndirnar og skannar inn í tölvu en vinnur þær ekki frekar. Hver mynd kostar 1.000 krónur en 2.000 krónur ef fólk vill fá myndina heimsenda en stíll myndanna fer eftir skapi listamannsins hverju sinni.

„Ég ákvað að setja það inn af því þetta er það ódýrt, þannig að fólk gæti kannski ekki verið að panta eitthvað ákveðið, mér finnst þetta líka gaman ef maður gerir þetta bara eins og það kemur til manns,“ segir hún og bætir við: „Bara fyrsta hugmynd sem fer niður á blað, að ég sé ekki að krumpa blöð og byrja upp á nýtt.“

Rúmlega sjötíu manns hafa þegar keypt mynd af Ariönu og stefnir hún á að safna að minnsta kosti 140.000 krónum, til þess að dekka flug og gistingu.

„Það er kannski erfiðast þegar fólk er bara með mynd af sér þar sem það er sætt eða bara með selfie,“ segir Ariana þegar hún er spurð að því hvort ekki sé erfitt að teikna ókunnugt fólk. „Sumir eru með skemmtilega svipi, það er líka bara nóg til þess að gera myndina áhugaverða,“ segir hún hress að lokum.

Hægt er að panta mynd af Ariönu með því að senda hevnni póst á Facebook.com/ariana.katrin.






Fleiri fréttir

Sjá meira


×