Handbolti

Tandri Már: Stór nöfn í landsliðinu og erfitt að komast í hópinn

Eiríkur Stefán Ásgeirsson skrifar
Tandri Már hlustar á Guðjón Val Sigurðsson landsliðsfyrirliða á æfingu íslenska landsliðsins fyrr í vikunni.
Tandri Már hlustar á Guðjón Val Sigurðsson landsliðsfyrirliða á æfingu íslenska landsliðsins fyrr í vikunni. Vísir/Valli
Skyttan Tandri Már Konráðsson er einn þeirra sem berst um að komast með íslenska landsliðinu á HM í Katar sem hefst síðar í mánuðinum. Tandri Már hélt sumarið 2013 til Danmerkur þar sem hann spilaði með TM Tönder í dönsku B-deildinni en unnusta hans, Stella Sigurðardóttir, var þá á mála hjá SönderjyskE í dönsku úrvalsdeildinni.

Síðastliðið sumar söðlaði hann um og hélt til Stokkhólms og hefur hann verið í stóru hlutverki hjá Ricoh sem er nýliði í sænsku úrvalsdeildinni. Liðið er í ellefta sæti af fjórtán liðum og er Tandri Már markahæsti leikmaður liðsins með 87 mörk í nítján leikjum.

Tandri Már lék sína fyrstu landsleiki fyrr á árinu er hann tók þátt í æfingaleikjunum gegn Portúgal en engu að síður segir hann að það hafi komið sér á óvart að fá kallið frá Aroni Kristjánssyni landsliðsþjálfara nú.

Geri heiðarlega tilraun og sé til

„Ég var fyrst og fremst að einbeita mér að því að standa mig vel í Svíþjóð og því er þetta aukabónus að fá þetta tækifæri með landsliðinu,“ sagði Tandri Már sem segist ekki velta því mikið fyrir sér hvort hann komist í gegnum lokaniðurskurðinn og fari með til Katar.

„Ég geri bara heiðarlega tilraun til þess og sýni mitt besta á æfingum. Það eru stór nöfn í landsliðinu og erfitt að komast í hópinn. Ef það tækist væri það bara bónus – ef ekki þá er það bara næsta skipti,“ segir Tandri hógvær.

Ricoh er þjálfað af Ingemar Linnéll, fyrrverandi landsliðsþjálfara Svía og Tandri ber honum vel söguna.

„Hann er toppnáungi og leggur mikla áherslu á að öllum líði vel. Það skilar sér inn í hópinn,“ segir Tandri. „Ég hef getað æft mikið í vetur og bætt mig líka sem leikmann enda með stórt hlutverk í liðinu.“

Vísir/Valli
Skora mikið í seinni bylgju

Hann segist einnig hafa bætt sig sem varnarmaður en Tandri segir líklegt að leiðin fyrir hann inn í landsliðið felist fyrst og fremst í þeim möguleikum að komast inn sem varnarmaður.

„Algjörlega. Mér finnst gaman að spila vörn og að láta hina og þessa finna fyrir því. Þar fyrir utan hef ég verið að skora mikið í seinni bylgjunni [í hraðaupphlaupum] og tel það styrk að ég geti borið boltann upp, komið á mikilli fart og skotið. Minn gluggi inn í landsliðið núna er að koma inn sem varnarmaður,“ segir hann.

„En fyrst og fremst er það heiður fyrir mig að fá að vera með og þetta er frábært tækifæri. Það stefna allir að þessu og nú er þetta orðið að raunveruleika hjá mér.“

Ísland mætir Þýskalandi í sínum fyrstu æfingaleikjum fyrir HM í Katar í Laugardalshöllinni á sunnudag og mánudag. Liðið spilar svo æfingaleiki í Svíþjóð og Danmörku áður en það mætir Svíum í fyrsta leik á HM föstudaginn 16. janúar.


Tengdar fréttir

Sverre byrjar að æfa eftir áramót

Sverre Andreas Jakobsson var ekki á æfingu íslenska landsliðsins í gær en þá hófst formlegur undirbúningur þess fyrir HM í Katar.

Landsliðsfyrirliðinn fordæmir árásina á Aron

„Ég skil ekki hvernig svona lagað getur gerst – að það skuli ráðist á annan mann algjörlega tilefnislaust. Það er fyrir neðan allar hellur. Ég vona að það verði kært og komist til botns í þessu máli,“ sagði landsliðsfyrirliðinn Guðjón Valur Sigurðsson um líkamsárásina sem félagi hans í landsliðinu, Aron Pálmarsson, varð fyrir um helgina.

Aron gaf eina milljón til krabbameinssjúkra barna

Handboltamaðurinn Aron Pálmarsson hefur verið mikið í fréttunum í morgun eftir að það fréttist af því að íslenski landsliðsmanninn hafi orðið fyrir líkamsárás í miðbæ Reykjavíkur um helgina en kappinn bíður líka upp á góðar fréttir af sér í dag.

Aron: Tilefni til umhugsunar

Landsliðsþjálfari Íslands í handbolta segir að árásin á Aron Pálmarsson sýnir að menn þurfi að fara varlega og passa sig.




Fleiri fréttir

Sjá meira


×