Körfubolti

Talar sjaldan við Óla Stef

Kolbeinn Tumi Daðason skrifar
Ólafur Stefánsson tók fram skóna í vetur og spilaði með Kolding í Meistaradeild Evrópu.
Ólafur Stefánsson tók fram skóna í vetur og spilaði með Kolding í Meistaradeild Evrópu. Vísir/Daníel
Jón Arnór Stefánsson er yngstur fimm systkina. Elst er Íris, svo kemur Ólafur, næstur Eggert og svo Stefanía. Um mikla íþróttafjölskyldu er að ræða en Eggert spilaði með Fram í efstu deild í fótbolta, Stefanía sankaði að sér verðlaunum í tennis og Ólaf Stefánsson þarf varla að kynna fyrir neinum, hlaðinn verðlaunum eftir langan atvinnumannaferil í handbolta.

Ólafur hefur verið leiðtogi karlalandsliðsins í handbolta sem vann frækin afrek þar sem silfur á Ólympíuleikunum í Peking árið 2008 stendur upp úr. Jón Arnór hefur á svipaðan hátt leitt körfuboltalandsliðið á nýjar slóðir eftir fyrsta stórmót landsliðsins í Berlín. Jón Arnór segir þá Ólaf þó aldrei hafa rætt saman um hlutverk leiðtogans eða lært hvor af öðrum.

Sjá einnig: „Hvað er málið með þennan númer átta?“

„Við tölum voðalega lítið saman til að byrja með,“ segir Jón Arnór. Þegar þeir ræði saman á annað borð sitji þó mikið eftir. Þeir hafi reyndar náð kaffibolla fyrr í sumar eftir viðtal hjá RÚV þar sem þeir ræddu í klukkutíma.

„Ég var að reyna að útskýra fyrir honum ákveðna hluti á mínum ferli, hvernig mér liði gagnvart landsliðinu og fleira. Hann kom með mjög góða punkta eins og að við yrðum að fá eins mikið út úr þessari keppni og við gætum. Það yrði að vera ákveðið markmið, ekki bara að fara og vera ánægðir. Hefðum við tapað öllum leikjunum með fimmtíu stigum og ekki staðið í liðunum hefðum við ekki getað gengið sáttir frá borði. Það hefði verið allt önnur tilfinning.“

Jón Arnór einbeittur í leik Íslands og Tyrklands á EM í Berlín.Vísir/Valli
Breytist þegar allir verða á Íslandi

Það kemur blaðamanni mjög á óvart að Jón Arnór og Ólafur talist ekki oftar við. Þeir eru bræður, báðir atvinnumenn og með sameiginleg áhugamál.

„Ég hef alltaf verið úti og hann úti í sínu svo við höfum varla hist einu sinni yfir sumarið. Svo er hann rokinn í stórmót og við aldrei náð að tengjast,“ segir Jón Arnór. Þeir ræði samt alltaf að þegar þeir flytji heim muni það breytast. 

„Óli er nú fluttur heim og orðinn þokkalega jarðbundinn. Þá kannski byrjar eitthvað og það myndast meiri tengsl,“ segir Jón Arnór. Það séu þó alltaf fagnarfundir þegar þeir hittist og mjög náttúrulegt, eins og þeir hafi verið að ræða saman í gær.

„Þannig eiga bræðratengslin að vera,“ segir Jón Arnór. Hann tali sömuleiðis lítið við Eggert bróður sinn þótt samband þeirra sé mjög náið. Þeir tali um allt milli himins og jarðar þegar þeir hittast.

„Við erum bara svo lélegir að taka upp símann og hringja.“

Jón Arnór Stefánsson er í ítarlegu viðtali í helgarblaði Fréttablaðsins. Þar ræðir Jón um ástina, NBA-ævintýrið, eltingaleikinn við stúdentsprófið og ástæðu þess að hann hafnaði á lista með hryðjuverkamönnum.

Að neðan má sjá innslag sem spænsk sjónvarpsstöð vann í tilefni af komu Jóns Arnórs til CAI Zaragoza árið 2011. Þar er fjallað um boltabræðurna Eggert, Ólaf og Jón Arnór.


Tengdar fréttir

Jón Arnór aðeins einu sinni orðið stjörnustjarfur

Þrátt fyrir að körfuknattleikskappinn Jón Arnór Stefánsson hafi ýmist spilað með eða gegn fremstu leikmönnum Evrópu og æft með einu stærsta félaginu í NBA segist hann alltaf hafa haldið ró sinni, nema einu sinni.

Lúxuslíf síðan ég byrjaði með Lilju

Jón Arnór Stefánsson hefur flakkað um heiminn með körfubolta í hendi í átján ár. Íþróttamaður ársins leiddi landsliðið á sitt fyrsta Evrópumót, var á lista yfir hryðjuverkamenn og ætlar að fagna stúdentnum fyrir fertugt.




Fleiri fréttir

Sjá meira


×