Innlent

Svört skýrsla um milljónainnkaup lögreglunnar

Jón Hákon Halldórsson skrifar
Haraldur Johannessen er ríkislögreglustjóri.
Haraldur Johannessen er ríkislögreglustjóri.
Löggæslustofnanir keyptu vörur af fjórum fyrirtækjum í eigu lögreglumanna eða náinna venslamanna þeirra fyrir samtals rúmlega 91 milljón króna á tímabilinu janúar 2008 til apríl á þessu ári. Í nær öllum tilvikum var um að ræða búnað vegna löggæslustarfa. Að mati Ríkisendurskoðunar fór hluti þessara viðskipta í bága við lög um opinber innkaup. Stofnunin brýnir fyrir löggæslustofnunum að virða ákvæði laganna.

Í áliti Ríkisendurskoðunum segir að ríkisstofnunum beri að bjóða út öll kaup á vörum ef fjárhæðir viðskipta fara yfir tiltekin viðmiðunarmörk sem eru nú 6,2 milljónir króna. Ef fjárhæðir eru undir þessum mörkum beri að leita tilboða hjá sem flestum fyrirtækjum áður en kaup eru ákveðin.

Keyptu fyrir milljónir af foreldrum og eiginkonu lögreglumanna

Á fyrrnefndu tímabili keypti embætti ríkislögreglustjóra (RLS) nokkrum sinnum vörur af fyrirtækinu Landstjörnunni ehf. en það er í eigu foreldra manns sem starfaði sem lögreglumaður þegar meirihluti viðskiptanna fór fram. Ekki var aflað tilboða frá öðrum fyrirtækjum áður en kaupin voru gerð en fjárhæðir voru undir viðmiðunarmörkum útboðsskyldu.

Einnig keypti RLS búnað af fyrirtækinu Trademark ehf., sem er í eigu eiginkonu lögreglumanns, fyrir 12,6 milljónir króna án þess að kaupin hefðu verið boðin út. RLS heldur því fram að ekki sé rétt að líta þessi viðskipti sem ein kaup heldur þrenn og að fjárhæðir hafi verið undir viðmiðunarmörkum útboðsskyldu í öllum tilvikum. Ríkisendurskoðun hafnar þessu.

Lögregluskóli ríkisins keypti búnað af Trademark ehf. fyrir samtals 12,7 milljónir króna í desember 2010. Hvorki var efnt til útboðs áður en kaupin voru gerð né aflað tilboða frá fleiri fyrirtækjum.

Samkvæmt lögreglulögum ber RLS að hafa umsjón með kaupum á ökutækjum, búnaði og fatnaði lögreglu. Í ábendingunni kemur fram að árið 2008 keyptu sjö löggæslustofnanir búnað af Landstjörnunni ehf. fyrir um 7 milljónir króna án þess að kaupin hefðu verið boðin út. Ríkisendurskoðun telur að RLS hefði átt að efna til útboðs vegna þessara viðskipta í samstarfi við Ríkiskaup.

Innanríkisráðuneytisins að móta stefnu

Að mati Ríkisendurskoðunar þarf innanríkisráðuneytið að tryggja að löggæslustofnanir hafi sameiginlegan skilning á umsjónarhlutverki RLS og að því sé sinnt. Að auki þarf ráðuneytið að segja til um hvort það samrýmist störfum lögreglumanna að eiga og/eða starfa hjá fyrirtækjum sem lögreglan á í viðskiptum við. Þá telur Ríkisendurskoðun að löggæslustofnanir þurfi að taka verklag sitt við útboð og verðfyrirspurnir til endurskoðunar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×