Íslenski boltinn

Sveinn Aron sagður á leið til Ítalíu

Tómas Þór Þórðarson skrifar
Sveinn Aron Guðjohnsen hefur verið ískaldur að undanförnu en virðist vera á leið í atvinnumennskuna.
Sveinn Aron Guðjohnsen hefur verið ískaldur að undanförnu en virðist vera á leið í atvinnumennskuna. vísir/eyþór
Sveinn Aron Guðjohnsen, framherji Breiðabliks í Pepsi-deild karla í fótbolta, er líklega á leiðinni til ítalska B-deildarliðsins Spezia. Frá þessu er greint á Fótbolti.net.

Eysteinn Pétur Lárusson, framkvæmdastjóri Breiðabliks, staðfestir við Fótbolti.net að viðræður við Spezia eru langt komnar.

Fram kemur í ítölskum fjölmiðlum að Eiður Smári Guðjohnsen, faðir Sveins og markahæsti leikmaður íslenska landsliðsins frá upphafi, hafi skoðað aðstæður í Spezia og verið ánægður með það sem að hann sá.

Sveinn Aron fór vel af stað í Pepsi-deildinni í sumar og skoraði tvö mörk í fyrsta leik á móti ÍBV en síðan þá er hann aðeins búinn að skora eitt mark í tólf leikjum í deildinni.

Hann byrjaði fyrstu fjóra leiki liðsins og hefur byrjað átta af þrettán en Sveinn hefur verið varamaður í síðustu tveimur leikjum eftir að danski framherjinn Thomas Mikkelsen var fenginn til Kópavogsliðsins.

Hörður Björgvin Magnússon, landsliðsbakvörður í fótbolta, var á mála hjá Spezia eina leiktíð fyrir fjórum árum síðan.




Fleiri fréttir

Sjá meira


×