Innlent

Stuð í Herjólfsdal: Reyndu að komast í stemninguna á Þjóðhátíð án miða

Kolbeinn Tumi Daðason skrifar
Miðaverð á Þjóðhátíð var hækkað í ár.
Miðaverð á Þjóðhátíð var hækkað í ár. Vísir/Óskar P. Friðriksson
Nokkrir tugir fólks gerðu tilraun til þess að komast í Herjólfsdal án miða í gærkvöldi, fyrsta kvöldi Þjóðhátíðar. Hinum sömu var jafnóðum hent út af svæðinu en í kringum tuttugu öryggisverðir standa vaktina um Dalinn og sjá meðal annars til þess að miðalausir fái ekki aðgang.

Stemningin í Herjólfsdal í gærkvöldi var með eindæmum góð. Veður var milt og þurrt sem hefur góð áhrif á fólk ef marka má ummæli lögreglu hér í Eyjum undanfarin ár. 22 fíkniefnamál komu upp í gærkvöldi þar sem efni af ýmsum gerðum komu við sögu, allt frá amfetamíni og hassi yfir í kókaín. Í öllum tilfellum var um neysluskammta að ræða. Einn gisti fangageymslur vegna ölvunar.

Ekki liggur fyrir hve margir gestir eru staddir á Heimaey en kunnugir telja þá nokkuð færi en á sama tíma í fyrra. Hvers vegna færri séu mættir í ár en undanfarin ár er ekki ljóst en nefnt hefur verið að hækkun á miðaverði gæti hafa haft sitt að segja. Hins vegar er veðurspá mjög góð svo reikna má með því að fjölmargir gestir gætu skellt sér á miða í dag eða á morgun.

Bubbi og Dimma luku tónleikum sínum á laginu Fjöllin hafa vakað.Vísir/Óskar P. Friðriksson
Allt ætlaði um koll að keyra

Sálin hans Jóns míns flutti Þjóðhátíðarlag sitt „Haltu fast í höndina á mér“ í gær. Friðrik Dór, Bubbi og Dimma héldu uppi stuðina í aðdraganda brennunnar sem kveikt var upp í á miðnætti. Aðdragandinn var sérstaklega flottur en þegar eldur átti að kvikna urðu blístur og læti gesta í Dalnum minni en vonir stóðu til. Ástæðan var einföld. Það kviknaði ekki almennilega í brennunni.

Starfsmenn voru þó fljótir til og með benínsið og bálkesti að vopni var brennan orðin tignarleg innan nokkurra mínútna. Stóð hún lóðrétt sökum þess að vind hreyfði varla og var sérstaklega glæsileg. Að lokinni brennu trylltu strákarnir í FM95Blö lýðinn. Ætlaði allt um koll að keyra þegar þeir fluttu eigið þjóðhátíðarlag.

Land og Synir og Sóldögg spiluðu svo á stóra sviðinu og var stuð langt fram á nótt. Þegar fólk rankaði við sér í morgun voru göturnar svartar af bleytu og rigndi framan af degi. Nú er hins vegar farið að birta til og vonast eftir fínu veðri í dag.


Tengdar fréttir




Fleiri fréttir

Sjá meira


×