Straumur og Kaupþing meðal hæstu gjaldenda

Straumur-Burðarás og Kaupþing banki narta í hælana á Fjársýslu ríkisins á lista Skattstjórans í Reykjavík yfir þá, sem greiða hæstu opinber gjöld í ár. Reykjavíkurborg er í sjötta sæti með hátt í fjórfalt lægri gjöld en fjármálafyrirtækin tvö.

Þetta kemur meðal annars fram í álagningarskrá Skattstjórans sem lögð var fram í morgun. Fjársýslan, Straumur og Kaupþing, greiða öll yfir fimm milljarða hvert, Glitnir er í fjórða sæti, Landsbankinn í fimmta og svo Reykjavíkurborg sem greiðir innan við einn og hálfan milljarð. Því næst kemur FL Group, verktkafyrirtækið Bechtel sem byggði álverið í Reyðarfirði, Sjóvá og Icelandair er í tíunda sæti.

Kaupþing, Glitnir og Straumur eru langhæstu greiðendur tekjuskatts, að fjármagnstekjuskatti meðtöldum, greiða öll yfir fjóra milljarða. Landsbankinn kemur í humátt á eftir og FL Group er í fimmta sæti með 800 milljónir. Álagningin nemur samtals röskum 57 milljörðum króna og munar þar langmest um tekjuskatt, 33 milljarða, og tryggingagjald, 23 milljarða.