Erlent

Stór jarðskjálfti á Ítalíu

Samúel Karl Ólason skrifar
Líklegt þykir að tala látinna muni hækka.
Líklegt þykir að tala látinna muni hækka. Vísir/AFP
Tala látinna hefur hækkað upp í 73 eftir stóran jarðskjálfta á Ítalíu í nótt. Skjálftinn sem var 6,2 stig varð á tíu kílómetra dýpi á miðri Ítalíu og olli miklum skaða í þorpum og bæjum. Hins vegar virðist hann ekki hafa náð til mjög þéttbýlla svæða.

Samkvæmt Reuters fréttaveitunni eru þeir bæir sem urðu hvað verst úti Accumoli, Amatrice, Posta og Arquata del Tronto.

„Nú þegar sólin er komin upp, sjáum við að ástandið er enn verra en við óttuðumst. Byggingar hafa hrunið og fólk er fast í rústunum,“ segir bæjarstjóri Accumoli.

Bæjarstjóri Amatrice segir þrjá fjórðu húsa í bænum hafa hrunið og að björgunarmenn heyri í fólki í rústunum. Hann segist óttast að tugir séu látnir í bænum.

Skjálftinn vakti íbúa í 150 kílómetra fjarlægð frá miðju hans um klukkan hálf tvö í nótt að íslenskum tíma (3:36 á Ítalíu). Vitni segja hann hafa staðið yfir í um tuttugu sekúndur og að um 20 mínútum síðar hafi annar skjálfti orðið sem ekki hafi verið mikið minni.

Árið 2009 varð 6,3 stiga skjálfti í Aquila héraði Ítalíu. Þá dóu meira en 300 manns.

Þessi frétt var uppfærð reglulega fyrr í dag.

14:00

Embættismenn segja nú að minnst 73 séu látnir.

13:15


Fjölmiðlar í Ítalíu áætla nú að minnst 63 séu látnir vegna jarðskjálftans. Þar af eru minnst 35 í bænum Amatice, ellefu í Accumoli og tíu í Pescara del Tronto.

Nokkur hundruð eru sagðir hafa slasast og í raun er ekki vitað hve margra er saknað.

12:15

AP fréttaveitan hefur birt myndband af björgun manns og stúlku úr rústum húss á Ítalíu. Nánar tiltekið úr bænum Amatrice, en Sky News hefur eftir bæjarstjóranum þar að minnst 35 séu látnir þar.

11:25

Búið er að taka saman nokkrar fyrir og eftir myndir frá Ítalíu sem sýna vel hve mikil eyðileggingin er.

10:30

Matteo Renzi, forsætisráðherra Ítalíu, mun heimsækja svæðin sem urðu verst úti í dag. Hann sagði að nauðsynlegt væri að bregðast hratt við hörmungunum og að ekkert svæði yrði skilið út undan.

Hægt er að sjá myndir af hörmungunum í í Pescara del Tronto og Amatrice hér.

10:10

Jean-Claude Juncker, forseti framkvæmdastjórnar ESB, hefur sent Ítölum samúðarkveðjur og segir Evrópusambandið standa með þjóðinni.

10:00

Tala látinna er nú komin í 38 og 150 er saknað. Búist er við að tala látinna muni hækka frekar.

Utanríkisráðuneytið hefur ekki fengið upplýsingar um að Íslendingar séu á því svæði sem varð hvað verst úti í jarðskjálftanum á Ítalíu í nótt. Andri Lúthersson, deildarstjóri upplýsingamála hjá ráðuneytinu, segir í samtali við fréttastofu að borgaraþjónustan fylgist grannt með gangi mála. Þá geti þeir sem hafi ekki haft uppi á aðstandendum haft samband við þjónustuna símleiðis.

9.20

Bein Facebook útsending frá ítalska fjölmiðlinum la Repubblica. Hér er fylgst með á vettvangi í Amatrice.

Terremoto nel centro Italia - la diretta da Amatrice

Terremoto nel centro Italia - la diretta da Amatrice

Posted by la Repubblica on Wednesday, August 24, 2016
7.25

Brot úr útsendingu ítölsku fréttastofunnar Rai frá því klukkan hálf sex í morgun.

7.20

Myndskeið frá RT frá því í morgunsárið. Hér sjást íbúar svæðisins koma sér út á götu og lögregla og sjúkraliðar hlúa að þeim.

7.20

Útsending RT frá Ítalíu. Hér eru björgunarmenn að störfum í rústunum.

7.15

Loftmynd af bænum Amatrice. Hér sést eyðileggingin greinilega. Myndin er fengin frá slökkviliði svæðisins.




Fleiri fréttir

Sjá meira


×