Stjórnvöld í Aserbaídsjan gagnrýnd fyrir einræði
Íbúar á þessu svæði voru þvingaðir til að flytja út úr húsum sínum og þau síðan rifin.
nordicphotos/AFP
„Alþjóðasamfélagið hefur lítið gert til að sporna við þróun í átt að auknu einræði í landinu,“ segja mannréttindasamtökin Amnesty International um Aserbaídsjan, olíuríki í Kákasusfjöllum, þar sem til stendur að halda söngvakeppni evrópskra sjónvarpsstöðva í vor.
Í lok síðasta árs sendu samtökin frá sér skýrslu um ástand mannréttindamála í Aserbaídsjan, þar sem greint er frá árásum stjórnvalda á mótmælendur frá því að mótmæli gegn spillingu og kúgun brutust út í landinu í mars á síðasta ári.
„Síðan þá hefur ungt baráttufólk og stjórnarandstæðingar verið sett í fangelsi að geðþótta yfirvalda, eða í kjölfar upploginna ásakana, en blaðamenn og baráttufólk fyrir mannréttindum hafa sætt hótunum og áreitni.“
Í þessu andrúmslofti virðast samkynhneigðir nú hafa hætt við áform um að halda gleðigöngu stuttu fyrir söngvakeppnina.
Samkynhneigðir hafa fengið líflátshótanir og tugir manna hafa skráð sig á Facebook-síðu, sem stofnuð hefur verið gegn áformum um að halda gleðigöngu samkynhneigðra í landinu.
Flestir íbúar landsins eru múslímar og hafa litla samúð með samkynhneigðum.
Stjórnvöld segja að öllum sé frjálst að sækja um leyfi fyrir útisamkomum, en reynslan er sú að erfitt hefur verið að fá samþykki fyrir slíku, ekki síst síðustu mánuði.
Þá skýrði breska útvarpið BBC nýverið frá því að fjöldi manns hefði verið þvingaður til að flytja af heimilum sínum, sem síðan voru rifin til að rýma fyrir nýrri tónlistarhöll, sem verður vettvangur söngvakeppninnar í maí.
„Borgaryfirvöld í Bakú hafa engan lagalegan rétt til að flytja fólk nauðungarflutningum og eyðileggja húsin þeirra,“ hefur BBC eftir Zohrab Ismayil, formanni mannréttindasamtaka í Aserbaídsjan.
„Eins og stendur þá eru mannréttindabrot hér í Aserbaídsjan daglegur viðburður og þetta er aðeins eitt málanna,“ sagði Ismayil.
Amnesty International segir að sautján samviskufangar sitji nú í fangelsi í Aserbaídsjan.
„Uppsöfnuð áhrif þessara aðgerða stjórnvalda, ásamt með langvarandi refsileysi þeirra, eru þau að í landinu ríkir andrúmsloft ótta og sjálfsritskoðunar sem grefur undan lýðræðisþróun í Aserbaídsjan,“ segir í tilkynningu frá Amnesty.gudsteinn@frettabladid.is
- Fréttir
- Sport
- Viðskipti
- Lífið
Fréttir eftir mánuði
Hér má finna fréttir eftir mánuði.
- Sími 512 5000
- Hafðu samband
- Starfsfólk
- Umferð
- Veftré
- Auglýsingar
- 365 Skaftahlíð 24 105 Reykjavík Sími: 512 5000