Sterling og Ibe fengu aðvörun

Enskir fjölmiðlar greina frá því í dag að þeir Raheem Sterling og Jordan Ibe hafi í dag fundað með Brendan Rodgers, knattspyrnustjóra Liverpool.

Sterling og Ibe hafa komið sér í vandræði hjá Liverpool eftir að myndir af þeim birtust reykjandi vatnspípu á krá í London fyrr á tímabilinu. Þá birtist einnig myndband af Sterling þar sem hann andaði að sér hláturgas úr blöðru.

Um löglega vímugjafa er að ræða og var leikmönnunum ekki refsað sérstaklega af félaginu. En Rodgers mun hafa rætt við þá um ábyrgðina sem fylgir því að vera í aðalliði Liverpool og varaði við því að þeir myndu halda áfram að nota áðurnefnd efni.

Líklegt er að Sterling verði í byrjunarliði Liverpool gegn Aston Villa á sunnudag en þá mætast liðin á Wembley-leikvanginum í undanúrslitum ensku bikarkeppninnar. Ibe er ekki gjaldgengur í keppninni þar sem hann lék með Derby í bikarnum fyrr á tímabilinu sem lánsmaður.