Golf

Stenson kyssti könnuna og tileinkaði sigurinn vini sínum sem lést rétt fyrir mót

Tómas Þór Þórðarson skrifar
Henrik Stenson lyftir Silfurkönnunni fyrir Mike.
Henrik Stenson lyftir Silfurkönnunni fyrir Mike. vísir/gety
Svíinn Henrik Stenson tileinkaði sigurinn á opna breska meistaramótinu góðvini sínum Mike Gerbich sem féll frá á miðvikudaginn eftir baráttu við krabbamein. Það var daginn áður en mótið hófst.

Stenson spilaði með sorgarband á fyrsta keppnisdegi en hann lauk þá holunum 18 á Royal Troon-vellinum á 68 höggum eða þremur höggum undir pari.

Sjá einnig:Bætti sextán ára gamalt met Tiger og 23 ára gamalt met Norman

„Einn af góðu gæjunum kvaddi okkur í dag. Gamall vinur minn Mike Gerbich tapaði í baráttunni við krabbamein en hans verður ávallt saknað. Hvíl í friði,“ skrifaði Stenson á Instagram-síðu sína á fimmtudaginn.

Í dag sagði hann eftir sigurinn: „Ég þarf að þakka mörgum fyrir þetta. Ég vil þakka konunni minni, fjölskyldunni og liðinu fyrir allt sem þau hafa lagt á sig og einnig vil ég þakka stuðningsmönnunum.“

Stenson beygði svo aðeins af er hann minntist Gerbich. Hann kyssti Silfurkönnuna, sigurlaunin fyrir opna breska, hóf hana til lofts og sagði: „Ég missti góðan vin á miðvikudaginn sem barðist við krabbamein. Hann var með mér alla vikuna. Þetta er fyrir Mike.“

Mike Gerbich var 74 ára gamall Bandaríkjamaður frá Scottsdale í Arizona. Hann bjó í Dubai en þeir Stenson voru miklir vinir.

„Hann hefur verið einn af mínum dyggustu stuðningsmönnum í gegnum tíðina eða allt frá því í kynntist honum á Emirates-mótinu í Duba. Hann var frábær maður sem stóð alltaf með mér,“ sagði Stenson í viðtali við sænska fjölmiðla eftir fyrsta hringinn.

Stenson er fyrsti Svíinn sem vinnur risamót í karlaflokki í golfi en þetta var í fyrsta sinn sem Bandaríkjamaður vinnur ekki opna breska á Royal Troon síðan 1973 en Bandaríkjamenn fögnuðu þar sigri fimm sinnum í röð.


Tengdar fréttir

Bætti sextán ára gamalt met Tiger og 23 ára gamalt met Norman

Kylfingurinn Henrik Stenson skrifaði sig í sögubækurnar er hann varð fyrsti sænski kylfingurinn til að vinna eitt af risamótunum í golfi en hann bætti með því 16 ára gamalt met Tiger Woods og 23 ára gamalt met Greg Norman.




Fleiri fréttir

Sjá meira


×