Viðskipti innlent

Starfsfólk Sjóvár gat grætt eina og hálfa milljón

Haraldur Guðmundsson skrifar
Hermann Björnsson forstjóri Sjóvár og Páll Harðarson, forstjóri Kauphallarinnar, við skráninguna í gær.
Hermann Björnsson forstjóri Sjóvár og Páll Harðarson, forstjóri Kauphallarinnar, við skráninguna í gær. Vísir/GVA
Starfsmenn Sjóvár sem keyptu bréf í hlutafjárútboði tryggingafélagsins gátu við lokun markaða í gær grætt allt að 1,5 milljónir króna á bréfunum. Aðrir almennir fjárfestar gátu þá mest grætt 34 þúsund krónur á því að selja sín bréf í félaginu.

Þegar niðurstöður almenns hlutafjárútboðs Sjóvár voru kynntar í byrjun mánaðarins kom í ljós að heildareftirspurn í útboðinu hafði verið sjöfalt meiri en söluandvirði þeirra hluta sem boðnir voru út. Sú mikla þátttaka leiddi til þess að hámarksúthlutun til almennra fjárfesta var 227 þúsund krónur. Tilboð fastráðinna starfsmanna Sjóvár voru aftur á móti ekki skert. Þeir gátu því keypt hlutabréf fyrir allt að tíu milljónir króna í útboðinu, eins og allir almennir fjárfestar áttu upphaflega að geta.

„En eftirspurnin innan fyrirtækisins var ekki slík að það væri talin ástæða af eigendum að skerða hluti starfsmanna," segir Hermann Björnsson, forstjóri Sjóvar.

„Það er tvenns konar fyrirkomulag sem er þekkt hér á landi. Annars vegar þegar starfsmönnum er veittur afsláttur af gengi bréfa eða hins vegar þegar sett er í skráningarlýsingu fyrirheit um það að skerða starfsmenn minna eða ekkert. Eigendur tóku seinni valkostinn þar sem starfsmenn voru að fá þetta á sama gengi og aðrir en þetta er ákveðinn jákvæður hvati gagnvart starfsmönnum," segir Hermann.

Í gær var sagt í fjölmiðlum að stjórn tryggingafélagsins myndi leggja fram tillögu um að koma á árangurstengdu launakerfi fyrir starfsmenn á næsta aðalfundi félagsins sem fer fram 29. apríl. Hermann segir þetta ekki rétt. Þarna sé einungis um að ræða starfskjarastefnu félagsins sem þurfi að liggja fyrir á öllum aðalfundum.

„Þessi sama stefna lág fyrir í fyrra og sú ályktun að við séum að taka upp kaupaukakerfi er ekki rétt. Það liggur fyrir sambærileg tillaga fyrir aðalfundinn um heimild til upptöku hvatakerfis. Verði sú heimild nýtt, sem ekki er búið að taka ákvörðun um, kemur hún ekki til framkvæmda fyrr en að undangengnu samþykki hluthafafundar og slík tillaga mun ekki liggja fyrir á næsta hluthafafundi."

Fyrsti dagur Sjóvár í Kauphöll rólegurHlutabréf í Sjóvá voru tekin til viðskipta á Aðalmarkaði Kauphallarinnar í gær. Bréf almennra fjárfesta höfðu við lokun markaða hækkað um 15,1% og bréf fagfjárfesta um 1,4%. Velta með bréfin nam rúmum 254 milljónum króna.

 „Þetta var nú öllu rólegri fyrsti dagur en við höfum séð í allra síðustu útboðum eins og sést á heildarfjárhæðinni og hvaða hlutfall af félaginu er að skipta um hendur," segir Magnús Harðarson, forstöðumaður viðskiptasviðs Kauphallarinnar."

„Þetta voru margar litlar færslur og litlu fjárfestarnir réðu svolítið deginum og það voru stærri fjárhæðir að fara á milli í útboðum hinna tryggingafélaganna."






Fleiri fréttir

Sjá meira


×