Lífið

Stalín, Ólafur Thors og Napóleon í myndbandi með Young Karin

Kjartan Atli Kjartansson skrifar
Myndband við lagið Sirens með hljómsveitinni Young Karin verður frumsýnt í dag. Því er leikstýrt af Magnúsi Leifssyni, sem um helgina fékk einmitt Íslensku tónlistaverðlaunin fyrir myndband sitt við lagið Tarantúlur með rappsveitinni Úlfur Úlfur.

Í myndbandinu má sjá vaxmyndir sem eiga sér langa sögu en eru nú í geymslu í Kópavogi. „Ég hef aldrei eytt eins miklum tíma í vinnslu við myndband,“ segir Logi Pedro Stefánsson, annar meðlima Young Karin, og rifjar upp hvernig tökum var háttað:

„Við þurftum að fá sérstakt leyfi til þess að taka upp í geymslunni þar sem stytturnar eru. Starfsmaður frá Þjóðminjasafninu var viðstaddur tökurnar og hjálpaði okkur að stilla styttunum upp því enginn mátti snerta þær nema hann. Stytturnar eru margar í ansi slæmu ásigkomulagi.“

Hér sést Karin Sveinsdóttir horfa á forláta vaxmyndastyttu.
Fáir vita af styttunum

Stytturnar voru til sýnis í Þjóðminjasafninu frá 1951 til 1969 en vaxmyndasafnið var stofnað á sínum tíma af Óskari Halldórssyni útgerðarmanni. Hann gaf safnið í minningu sonar síns, Óskars Theódórs, sem lést á sjó fyrir aldur fram.

Í safninu eru mörg stórmenni sögunnar, bæði innlend og erlend. Þar á meðal Napóleon, William Shakespeare og hinn alræmdi Adolf Hitler.

Á meðal innlendra fyrirmynda vaxmyndanna eru Jónas frá Hriflu, Sigurður Nordal og Davíð Stefánsson frá Fagraskógi. „Stytturnar gera mikið fyrir myndbandið. Þær veita ákveðinn „kontrast“,“ segir Logi.

Í myndbandinu má sjá hann og Karin Sveinsdóttur söngkonu inn á milli vaxmyndanna. „Það er sérstakt að sjá Karin innan um alla þessa karlmenn, sýnir feðraveldið í sinni skýrustu mynd,“ bætir Logi við en aðeins er ein vaxmynd af konu; Önnu Borg Reumert leikkonu, sem fæddist árið 1903.

Magnús Leifsson leikstjóri kom upp grænum skjá í geymslunni.
Tekið upp í sumar

Myndbandið var tekið upp í júlí og er því mikil vinna að baki.

„Þetta var mjög dýrt verkefni og við erum afar þakklát Landsbankanum sem hjálpaði okkur við vinnsluna.“

Sökum þess að ekki mátti flytja stytturnar þurftu allar tökur að fara fram í geymslu í umsjá Þjóðminjasafnsins.

„Við þurftum að setja upp svokallaðan „green-screen“ þarna inni. Vinnslan eftir að tökum var lokið var því ansi löng og ströng, en þetta var algjörlega þess virði. Við erum einstaklega ánægð með útkomuna.“

Lagið heitir Sirens og er af EP plötu Young Karin, n°1.
Young Karin fékk um helgina íslensku tónlistarverðlaunin í flokki Nýliðaplötu ársins og fékk sveitin fyrir vikið 750 þúsund krónur sem eru eyrnamerktar í myndbandagerð.

„Það skiptir miklu máli að vera með flott myndbönd upp á dreifingu erlendis. Við erum í skýjunum með þessi verðlaun,“ segir Logi. 


Tengdar fréttir






Fleiri fréttir

Sjá meira


×