Stálendurvinnsla að rísa á Grundartanga

Þessar vikurnar er að lifna mikið yfir iðnaðar- og athafnasvæðinu á Grundartanga og ljóst að þar verður margt í gangi á þessu ári. Í næstu viku verður byrjað á undirstöðum fyrir 4000 fermetra byggingu endurvinnslufyrirtækisins GMR (Geothermal metal recycling), sem mun endurvinna stál úr brotamálmi, að drjúgum hluta frá álverunum í landinu. Áætlað er að þessi verksmiðja muni taka til starfa á fyrri hluta næsta árs. Ársframleiðslan verði til að byrja með 30 þúsund tonn, sem veita muni 20 manns atvinnu, auk þess sem um 40 manns munu starfa við að reisa verksmiðjuhúsið sem verður byggt á stálgrind.