Viðskipti innlent

Sparnaður stefnir loðnuvertíðinni í voða

Jón Sigurður Eyjólfsson skrifar
Fjársvelti á Hafró gæti gert það að verkum að erfiðara væri að hafa upp á þessum dyntótta fiski.
Fjársvelti á Hafró gæti gert það að verkum að erfiðara væri að hafa upp á þessum dyntótta fiski. Vísir/Óskar P. Friðriksson
 Verið er að stofna miklum hagsmunum í voða með því að tryggja ekki fjármuni fyrir loðnuhaustmælingu Hafrannsóknastofnunar, segja aðilar LÍÚ. Jóhann Sigurjónsson, forstjóri Hafró, segir að við óbreyttar aðstæður hafi stofnunin ekki burði til að framkvæma þær.

Niðurstöður loðnuhaustmælingar eru forsendan fyrir ákvörðun um byrjunarkvóta næsta hausts á eftir. „Við værum því ekki í stakk búin til að gefa tillögu um byrjunaraflamark fyrir vertíðina á næsta ári,“ segir Jóhann.

Hann er þó ekki búinn að gefa upp alla von. „Þetta er afleit staða og við munum fara yfir þetta á næstu dögum með hlutaðeigandi aðilum og ég vil enn vona að úr rætist.“

Kolbeinn Árnason
Kolbeinn Árnason, framkvæmdastjóri LÍÚ, segir þetta skapa gríðarlega óvissu sem geti stefnt loðnuvertíðinni í voða.

Hann bendir á að ef engin er haustmælingin vaxi hættan á því að vetrarmælingin heppnist síður en hún er forsenda þess að hægt sé að gefa út viðbótarkvóta. Upphafskvóti er 225 þúsund tonn, sem skiptist þó ekki eingöngu á íslenskar útgerðir, en almennt er gert ráð fyrir aukningu upp á annað eins í viðbótarkvóta.

Jóhann Sigurjónssonfréttablaðið/pjetur
„Til að varpa ljósi á hagsmuni málsins má ætla að útflutningsverðmæti 200 þúsund tonna af loðnu sé ekki undir 12 milljörðum króna í gjaldeyristekjum. Til hliðsjónar má ætla að loðnuleiðangur Hafró kosti um 60-70 milljónir króna,“ segir Kolbeinn.

„Þetta er engan veginn ásættanlegt,“ segir Gunnþór Ingvason, framkvæmdastjóri Síldarvinnslunnar.

„Stjórnvöld hljóta að svara því hvort þau ætli að fjársvelta Hafrannsóknastofnun það mikið að hún geti ekki sinnt grunnrannsóknum þannig að það sé hægt að hámarka nýtingu auðlindarinnar með sjálfbærum hætti.“






Fleiri fréttir

Sjá meira


×