Golf

Spáði fyrir um óvæntan sigur Danny Willett á Mastersmótinu

Óskar Ófeigur Jónsson skrifar
John Daly er hér til hægri en vinstra megin á myndinni klæðir Jordan Spieth Danny Willett í græna jakkann.
John Daly er hér til hægri en vinstra megin á myndinni klæðir Jordan Spieth Danny Willett í græna jakkann. Vísir/Getty
Bandaríski kylfingurinn John Daly þekkir golfið og bestu kylfinga heimsins betur en margur og hann sannaði það í spádómi sínum fyrir úrslit Mastersmótsins um helgina.

Það kom flestum mikið á óvart að sjá hinn 28 ára gamla og lítt þekkta Englending Danny Willett fagna sigri á Augusta-golfvellinum á sunnudagskvöldið en John Daly var með það að hreinu að það væri von á miklu frá honum.

John Daly mætti nefnilega í “The Dan Patrick Show” í síðustu viku og nefndi Danny Willett fyrstan á nafn þegar hann var beðinn um að spá fyrir um það hver fengi græna jakkann í ár.

„Danny Willett er sá sem ég tel að geti komið á óvart á mótinu. Við munum sjá þá bestu berjast um þetta. Við munum sjá Jason Day meðal efstu manna og það er aldrei hægt að afskrifa Phil Mickelson eða Bubba (Watson). Takið samt eftir mönnum eins og Scott Piercy eða Danny Willett. Þeir spila báðir mjög vel á mjög hröðum flötum," sagði John Daly fyrir Mastersmótið.

Danny Willett hafði aldrei komist inn á topp fimm á risamóti hvað þá unnið það fyrir Mastersmótið í ár og það þótti því athyglisvert hvað John Daly hafði mikla trú á honum.

John Daly sýndi það að hann þekkir vel til manna í golfinu og þessi frábæri spádómum mun kannski hjálpa honum að verða fyrirliði bandaríska Ryder-liðsins í framtíðinni.


Tengdar fréttir




Fleiri fréttir

Sjá meira


×