Íslenski boltinn

Spá Fréttablaðsins og Vísis: Fjölnir hafnar í 9. sæti

Fjölnirmenn urðu einnig í 9. sæti í fyrra.
Fjölnirmenn urðu einnig í 9. sæti í fyrra. vísir/valli
Fréttablaðið og Vísir telur niður í Pepsi-deild karla í knattspyrnu með árlegri spá sinni. Íslandsmótið hefst 3. maí og þar á Stjarnan titil að verja eftir að verða meistari í fyrsta skipti í sögu félagsins.

Fréttablaðið og Vísir spáir Fjölni níunda sæti en það er sama sæti og liðið hafnaði í á síðustu leiktíð. Fjölnir hélt sér uppi sem nýliði í fyrra líkt og það gerði 2008, en ári síðar féll liðið niður í 1. deildina og var þar til það komst aftur upp haustið 2013.

Ágúst Gylfason heldur áfram um stjórnartaumana hjá Fjölnir en hann tók við liðinu af Ásmundi Arnarsson þegar hann fór í Árbæinn. Ágúst hefur gert fína hluti með Fjölnisliðið; komið því upp í deild þeirra bestu og haldið því þar.

LÍKLEGT BYRJUNARLIÐ
graf/garðar
EINKUNNASPJALDIÐ

Vörnin: 3 stjörnur (af 5)

Sóknin: 1 stjarna

Þjálfarinn: 2 stjörnur

Breiddin: 2 stjarna

Liðsstyrkurinn: 3 stjörnur

Hefðin: 1 stjarna

Ólafur Páll Snorrason, Bergsveinn Ólafsson og Þórður Ingason.vísir/vilhelm/valli/stefán
ÞRÍR SEM FJÖLNIR TREYSTIR Á

Ólafur Páll Snorrason: Stoðsendingakóngur deildarinnar undanfarin ár er kominn aftur heim. Hann var frábær þegar hann sneri aftur heim 2008 en hefur auðvitað elst. Ólafur er spilandi aðstoðarþjálfari þannig hlutverk hans er stórt og ábyrgðarmikið. Hefur fundið sér nýjan stað í liðinu inn á miðjunni þar sem hann verður að sýna gæði sín og reynslu.

Bergsveinn Ólafsson:
Fjölnir fékk á sig fæst mörkin af neðstu liðunum fjórum í Pepsi-deildinni í fyrra og um það munaði á endanum. Algjör leiðtogi í varnarleiknum með stórt Fjölnishjarta. Leikmaður sem stærri lið voru að skoða en fyrir honum kemur ekkert annað til greina en að standa með Fjölni.

Þórður Ingason
: Markvörður Fjölnismanna átti gott tímabil í fyrra og fylgdi þar eftir enn betra ári í 1. deildinni 2013. Eftir erfiða daga í KR 2010 virtist Þórður hafa gott af tveggja ára dvöl hjá BÍ/Bolungarvík en hann hefur verið öflugur fyrir Fjölni undanfarin tvö ár. Þórður má hvergi slá slöku við og helst fá á sig færri mörk en í fyrra.

Emil Pálsson er á láni frá FH.vísir/vilhelm
Nýstirnið: Emil Pálsson

Verið í deildinni í nokkur ár og spilað rullu hjá FH-liðinu. Búinn að vinna Íslandsmeistaratitil og er því ekkert að byrja í þessu.

Nú er aftur á móti hans tími kominn að skína, en loksins fær hann að spila 22 leiki í 90 mínútur og sýna virkilega hvað hann getur. Sterkur miðjumaður sem getur skorað, en mörk af miðjunni er nákvæmlega það sem nánast framherjalausu Fjölnisliðinu vantar.

Fjölnismenn hafa styrkt byrjunarliðið.vísir/stefán
MARKAÐURINN

Komnir:

Emil Pálsson frá FH (lán)

Ólafur Páll Snorrason frá FH

Arnór Eyvar Ólafsson frá ÍBV

Daniel Ivanovski frá Mjällby

Farnir:

Arnar Freyr Ólafsson í Leikni

Árni Kristinn Gunnarsson í Augnablik

Chris Tsonis

Gunnar Valur Gunnarsson í Vængi Júpíters

Magnús Páll Gunnarsson hættur

Síðast þegar Fjölnir var uppi féll liðið á öðru ári sem geta reynst liðum erfið. Þá misstu Fjölnismenn marga sterka leikmenn en það gerðist ekki í vetur.

Ágýst Gylfason fyllti í skörðin í varnarleiknum með Arnóri Eyvari Ólafssyni, sem hefur líklega verið vanmetnasti varnarmaður deildarinnar undanfarin ár, og þá er kominn sterkur útlendingur í miðvörðinn með Bergsveini sem á yfir 100 leiki að baki í efstu deild Svíþjóðar.

Við það bættust tveir leikmenn úr FH; fyrirliðinn Ólafur Páll Snorrason og Emil Pálsson. Þeir munu væntanlega spila saman á miðjunni en þarna koma bæði mikil gæði inn í liðið sem og reynsla og leiðtogahæfileikar með Ólafi.

Nú er kominn tími á að Emil sýni hvað hann geti og taki deildina með trukki og dýfu enda bara á láni og á enn framtíð fyrir sér í Hafnarfirði. Þetta er kjörið tækifæri fyrir hann að spila alla leiki.

Það verður ekki annað sagt en Fjölnismenn hafi gert góða hluti á leikmannamarkaðnum; fengu gæði og reynslu í bland við unga og skemmtilega heimamenn. Fín blanda.

HVAÐ SEGIR SÉRFRÆÐINGURINN?

Hjörvar Hafliðason hefur í sex ár verið einn helsti sparkspekingur landsins þegar kemur að Pepsi-deildinni. Hann spilaði með HK, Val og Breiðabliki í efstu tveimur deildum Íslandsmótsins á tíu ára ferli. Hjörvar verður einn af þremur sérfræðingum Pepsi-markanna í sumar, en þetta er fimmta árið hans í þættinum.

Ágúst Gylfason er þjálfari Fjölnis.vísir/pjetur
STYRKLEIKAR LIÐSINS:

Sterkur varnarleikur, en liðið fékk aðeins á sig átta mörk í sjö leikjum í riðlakeppni Lengjubikarsins. Því fylgdi reyndar skellur gegn ÍA en varnarleikurinn hefur verið stolt liðsins undir stjórn Gústa Gylfa. Reynsla af toppbaráttu er komin í hópinn með Ólafi Páli, Emil og Arnóri og þá er mikil samstaða í Fjölnisliðinu og andinn oftast mjög góður.

VEIKLEIKAR LIÐSINS:

Sóknarleikurinn gæti orðið mjög mikill hausverkur, en liðið skoraði aðeins níu mörk í átta leikjum í Lengjubikarnum. Það vantar klárlega alvöru framherja í liðið, en vængmaðurinn Þórir Guðjónsson er líklegur til að byrja fremstur. Eins og með fleiri lið nálægt fallsvæðinu vantar breidd í liðið en hún er þó meiri en í fyrra.

Guðmundur Karl Guðmundsson verður í vinstri bakverðinum í sumar.vísir/valli
BINNI BJARTSÝNI SEGIR:

Það fer enginn niður með stoðsendingakónginn Ólaf Pál Snorrason í sínu liði. Síðast féllum við á öðru ári því Óli fór í Val og fleiri sterkir leikmenn hurfu á braut. Emil Pálsson mun sýna hvers hann er megnugur og varnarleikurinn okkar er frábær.

SIGGI SVARTSÝNI SEGIR:

Annað tímabilið er alltaf erfiðara og það vitum við best sjálfir. Liðin í kringum okkur eru með markaskorara sem okkur sárvantar. Svo er stemningin engin í Grafarvoginum og fleiri eru farnir að mæta á handboltaleiki í 1. deild en sjá okkur spila við bestu fótboltalið landsins.


Tengdar fréttir




Fleiri fréttir

Sjá meira


×