Sólin hefur góð áhrif á astma

Tíminn sem astmasjúklingar verja í að sóla sig getur haft áhrif á sjúkdóm þeirra ef marka má nýja rannsókn.

Það var hópur vísindamanna við Kings College skólann í Lundúnum sem stóð að rannsókninni og segja þeir niðurstöðurnar sýna að tengsl séu á milli lítils magns af D-vítamíni og verri einkenna astma. Breska ríkisútvarpið greindi frá rannsókninni.

Líkaminn framleiðir D-vítamín í sólinni og sólböð hafa því töluverð áhrif á magn D-vítamíns í líkama fólks. Vísindamennirnri segja að að D-vítamínið hjálpi þeim hluta ónæmiskerfisins sem er ofvirkur hjá astmasjúklingum til að róa sig og dragi þannig úr einkennum sjúkdómsins.

Enn á þó eftir að rannsaka hvort að það að taka inn D-vítamín geti hjálpað sjúklingunum eða hvort að sólina þurfi til.