Innlent

Slysagildra frá 2007: Kom að litlum strák föstum í vatninu

Hanna Ólafsdóttir skrifar
Eins og sjá má myndast lítið stöðuvatn í vætusömu veðri þar sem áður átti að reisa 800 fermetra einbýlishús.
Eins og sjá má myndast lítið stöðuvatn í vætusömu veðri þar sem áður átti að reisa 800 fermetra einbýlishús. Fréttablaðið/Ernir
„Eins og staðan er núna, þá er pollur yfir öllum grunninum þarna. Jarðvegurinn hefur alltaf tekið við, en nú er það að breytast. Það er komið miklu stærra vatn þarna heldur en nokkurn tíma áður,“ segir Una Mathiesen Nikulásdóttir, íbúi í Hafnarfirði, um lóð að Stekkjarbergi 9 í bænum. Íbúar í grennd við lóðina segja hana slysagildru, þar sem ofan í henni safnist fyrir vatn sem laði að sér börn að leik.

„Sjálf hef ég veitt lítinn strák þarna upp úr. Ætli hann hafi ekki verið í fyrsta bekk. Hann stóð fastur í leðju og vatnið náði honum upp að hnjám. Hann var í stígvélum og ætlaði bara aðeins að sulla. Ég var að keyra þarna fram hjá og sá hann bara fyrir tilviljun.“

Una segist nokkrum sinnum hafa haft samband við bæjaryfirvöld til að lýsa yfir áhyggjum vegna málsins. „Þar benda bara allir hver á annan, segir Una, þreytt á viðbragðsleysi bæjaryfirvalda.

Lóðin er í eigu Magnúsar Ármanns sem árið 2007 hugðist reisa þar 800 fermetra einbýlishús. Ekkert hefur verið unnið í húsgrunninum í talsverðan tíma og óljóst er um áform Magnúsar og konu hans um að ljúka við byggingu hússins.

Ólafur Ingi Tómasson, formaður skipulags- og byggingaráðs Hafnarfjarðar segir ástæðu vatnssöfnunarinnar vera stíflu í frárennslislögn sem ekki hefur verið hægt að losa en unnið sé að því að leggja nýja lögn frá grunninum.




Fleiri fréttir

Sjá meira


×