Innlent

Slökkviliðið treystir á 34 ára gamlan bíl

Jón Hákon Halldórsson skrifar
Aðalbíll slökkviliðsstöðvarinnar á Tunguhálsi er árgerð 1983. Bílarnir í Skógarhlíð eru yfir áratugagamlir.
Aðalbíll slökkviliðsstöðvarinnar á Tunguhálsi er árgerð 1983. Bílarnir í Skógarhlíð eru yfir áratugagamlir. vísir/anton
Aðalbíll slökkvistöðvarinnar á Tunguhálsi í Reykjavík er frá árinu 1983 og því 34 ára gamall. Annar bíll sem slökkvistöðin hefur yfir að ráða, sem er frá árinu 1998, er í viðgerð á Ólafsfirði. Þar er verkstæði sem annast viðgerðir á slökkviliðs- og sjúkraflutningabílum.

Þeir slökkviliðs- og sjúkraflutningamenn sem Fréttablaðið hefur rætt við furða sig á fréttum þess efnis að strætó hafi ákveðið að kaupa níu rafstrætóa frá Kína. Hins vegar sé ekki búið að ljúka við útboð á nýjum slökkviliðsbílum.

Jón Viðar Matthíasson, slökkvliðsstjóri höfuðborgarsvæðisins.vísir/stefán
„Þetta er ófremdarástand. Ef við miðum við hin tæki byggðarsamlaganna, þá eru það fyrst og fremst þjónustubílar, strætisvagnar og sorphirðubílar. En þessir bílar sinna ákveðnu öryggi. Það er lífsnauðsynlegt að þessir bílar séu í lagi. Forgangsröðunin virðist vera svolítið öfugsnúin ef öryggistækin sem eru á ferðinni þegar eitthvað alvarlegt er að gerast eru svona öldruð. Það er óásættanlegt,“ segir hann. Ástandið er eitthvað skárra á stöðinni í Skógarhlíð. Jón telur að tveir yngstu bílarnir þar séu Scania-bílar frá árinu 2001 til 2003.

Jón Viðar Matthíasson, slökkviliðsstjóri á höfuðborgarsvæðinu, segir undirbúning að kaupum á nýjum slökkviliðsbílum hafa verið í gangi í langan tíma. „En svo komu inn hrunárin, sem stoppaði þetta. Svo erum við að klára útboðslýsingarnar næstu daga,“ segir Jón Viðar. Ekki þurfi að líða meira en tvær til þrjár vikur þar til útboðslýsingarnar verða tilbúnar.

Jón Viðar segir stöðuna á bílaflota slökkviliðsins engan veginn vera góða, en búið sé að fá heimild til að kaupa fjóra nýja bíla. „Það koma tveir bílar saman fyrst og svo koma hinir tveir hvor sitt árið,“ segir Jón Viðar og býst við að fyrstu bílarnir gætu komið eftir eitt og hálft ár.

Jón Viðar segir að í efnahagshruninu hafi aðaláherslan verið lögð á að koma í veg fyrir að þurfa að fækka mönnum. Þá hafi verið ákveðið að byggja nýja slökkvistöð í Mosfellsbæ til að bæta viðbragðstímann. Nú sé komið að því að endurnýja tæki.

Undanfarið hefur slökkviliðið auglýst eftir starfsmönnum í dagblöðunum. Jón segir það hafa gengið vel. „Við höfum verið heppin að það er alltaf stór hópur sem sækir um,“ segir Jón Viðar og bætir við að í þetta skipti hafi um hundrað manns sótt um en í kringum 20 verði ráðnir. Eftir það telji starfsliðið um 170-180 manns að meðtöldum sumarstarfsmönnum.

Fréttin birtist fyrst í Fréttablaðinu.




Fleiri fréttir

Sjá meira


×