Innlent

Skrá ekki skipin á Íslandi

Jón Sigurður Eyjólfsson skrifar
Það væri ekki eftir reglubókinni að segja að Helgafellið væri hér á leið til heimahafnar því skipið er skráð í Þórshöfn. Nú er verið að reyna að lokka það, sem og önnur skip, til íslenskrar heimahafnar.
Það væri ekki eftir reglubókinni að segja að Helgafellið væri hér á leið til heimahafnar því skipið er skráð í Þórshöfn. Nú er verið að reyna að lokka það, sem og önnur skip, til íslenskrar heimahafnar. Vísir/GVA
Einungis tvö skip sem uppfylla kröfur um kaupskip eru á íslensku skipaskránni þrátt fyrir að árið 2007 hafi lögum verið breytt í því skyni að stuðla að skráningu kaupskipa á Íslandi.

Starfshópur á vegum fjármálaráðuneytisins kannar nú hvort útfæra megi lagaumhverfi í kringum skráningu kaupskipa á Íslandi með þeim hætti að Ísland verði samkeppnishæft á alþjóðavettvangi á sviði kaupskipaútgerðar.

Hann tók til starfa í þessum mánuði og mun ljúka störfum í desember næstkomandi. Samkvæmt upplýsingum frá fjármála- og efnahagsráðuneytinu skal starfshópurinn sérstaklega beina sjónum sínum að því hvernig umhverfi fyrir skráningu skipa hérlendis er fyrir skip sem koma að starfsemi vegna olíuleitar á landgrunni Íslands. Ekki fékkst svar við því hjá fjármálaráðuneytinu hversu miklar fjárhæðir fælust í þeim ávinningi fyrir ríkissjóð ef íslenski kaupskipaflotinn fengist á íslensku skipaskrána.

Eins og komið hefur fram í fjölmiðlum hugðist Fáfnir Offshore skrá skip sitt í Fjarðabyggð en síðar komist að því að slíkt gerði það að verkum að skipið yrði ekki samkeppnishæft við nágrannaþjóðir eins og Færeyinga.

Steingrímur Erlingsson, framkvæmdastjóri Fáfnis Offshore, sagði í samtali við Fréttablaðið að hann fagnaði því að yfirvöld hefðu hafið þessa vinnu.

Færeyingar eru einmitt að skjóta okkur ref fyrir rass í þessum efnum en þar í landi eru til dæmis Samskipafleyin Arnarfell og Helgafell skráð.

„Almennt séð eru Samskip fylgjandi því að gera skráningar kaupskipa mögulegar á Íslandi,“ segir Anna Guðný Aradóttir, forstöðumaður markaðs- og samskiptadeildar Samskipa.

Ólafur William Hand, upplýsingafulltrúi Eimskipafélags Íslands, hefur einnig lýst álíka viðhorfi í fjölmiðlum fyrir hönd Eimskips.

Poseidon og Neptune, rannsóknarskip frá fyrirtækinu Neptune, eru hins vegar skráð hér á landi.




Fleiri fréttir

Sjá meira


×