Innlent

Skipar nefnd til að stuðla að velferð þeirra sem eru á vinnumarkaði

Stefán Árni Pálsson skrifar
Eygló Harðardóttir
Eygló Harðardóttir visir/daníel
Eygló Harðardóttir, félags- og húsnæðismálaráðherra, hefur skipað nefnd sem móta skal tillögu að vinnumarkaðsstefnu og skipulagi vinnumarkaðsmála hér á landi en þetta kemur fram í tilkynningu frá Velferðarráðuneytinu.

Nefndinni er ætlað að skila ráðherra niðurstöðum sínum fyrir lok þessa árs.

Fram kemur í tilkynningunni að leiðarljós nefndarinnar verði að stuðla að velferð þeirra sem eru þátttakendur á vinnumarkaði og einnig að tryggja virka þátttöku flestra á vinnumarkaði til að auka samkeppnishæfni Íslands.

Nefndinni er meðal annars ætlað að hafa hliðsjón af tillögum verkefnastjórnar Samráðsvettvangs um aukna hagsæld.

Þá á hún að kanna þörf fyrir sértækar vinnumarkaðsaðgerðir til að skapa störf í samræmi við menntun og skoða möguleika á aðgerðum til að laða sérhæft vinnuafl til starfa á innlendum vinnumarkaði.

Formaður nefndarinnar er Matthías Páll Imsland en í henni eiga sæti fulltrúar fjögurra ráðuneyta, Vinnumálastofnunar, Samtaka atvinnulífsins, heildarsamtaka launafólks (ASÍ, BSRB og BHM), Sambands íslenskra sveitarfélaga, fulltrúar þingflokka og fulltrúar Öryrkjabandalags Íslands, Landssamtakanna Þroskahjálpar og Geðhjálpar.




Fleiri fréttir

Sjá meira


×