Sjóníðingar: Áhöfn bátsins tvístrað - klámmynd á Facebook-veggnum

Skipið, sem fjórir sjómenn voru á, og voru dæmdir fyrir kvikindislegt ofbeldi gegn 13 ára dreng, var lagt fyrr á árinu og áhöfn skipsins var tvístrað. Báturinn sem um ræðir heitir Erling KE-140 og er netabátur.

Það er Saltver sem á bátinn en ekki náðist í framkvæmdastjóra útgerðarinnar þrátt fyrir ítrekaðar tilraunir.

Erling KE-140 fór aftur til veiða á þessu ári eftir að áhöfninni var tvístrað. Þegar Vísir hafði samband við núverandi skipstjóra skipsins sagðist hann hafa heyrt af málinu, hann bætti svo við að bátar gerðu fólki ekkert. Hann vildi að öðru leytinu ekkert tjá sig um það, þá helst vegna þess að hann vissi ekkert um atvikið, enda ekki á bátnum þegar það átti sér stað.

Báturinn er með Facebook síðu þar sem daglegu lífi sjómanna á bátnum er lýst. Síðasta færsla var þó í mars á síðasta ári, en atvikið með drenginn átti sér stað í tíu daga veiðitúr árið 2010.

Þar segir reyndar sjómaðurinn, sem heldur utan um síðuna, að „Gumma útgerðastjóra," hafi verið boðið í hópinn og því, „verðum við strákar að passa hvaða bull við setjum hérna inn," segir á síðunni.

Fjórir sjómenn voru dæmdir fyrir að beita þrettán ára dreng margvísislegu ofbeldi um borð í skipinu í þá tíu daga sem hann var um borð. Þeir otuð kynfærum í andlit drengsins og áreittu hann kynferðislega, sem þeir sjálfir útskýrðu sem „væga busun".

Þá voru þeir einnig dæmdir fyrir að sýna drengnum klámmynd. Í myndasafni á Facebook-síðu skipsins má einmitt finna ljósmynd af klámmynd í sjónvarpi um borð í skipinu.

Allir dómarnir voru skilorðsbundnir, sá sem hlaut þyngsta dóminn fékk þriggja mánaða skilorðsbundið fangelsi.

Samkvæmt frétt Pressunnar um málið starfa mennirnir ekki lengur á skipinu. Ekki er ljóst hvort þeir starfi enn hjá útgerðinni.