Skoðun

Sjálfbær þróun í hársnyrtiiðn

Ragnheiður Bjarnadóttir skrifar
Sum innihaldsefni í húð- og hárvörum smjúga í gegn um húðina og fara inn í blóðrás okkar sem hreinsar og skilar þeim út úr líkamanum aftur. Alltaf er verið að rannsaka hvort, hvar eða hversu mikið situr eftir í líkamanum af þessum efnum, hvort þau geti valdið tjóni og hvert leyfilegt hámarkshlutfall innihaldsefnis má þá vera ef það er notað á annað borð. Vísindanefnd Evrópusambandsins um öryggi neytenda (SCCS) gefur frá sér hvert álitið á fætur öðru varðandi hin ýmsu efni sem eru til skoðunar. Allt á þetta að vera leiðbeinandi fyrir framleiðendur, fagfólk og neytendur.

En vörur eru misjafnar að gæðum og eftirlit oft takmarkað. Upplýsingar frá þeim sem hafa hagsmuna að gæta eru stundum litlar, umdeilanlegar, misvísandi eða rangar. Varasöm innihaldsefni eru ógn við heilsu fólks sem kemst í beina snertingu við þau flesta daga í starfi sínu. Því þarf að efla áherslu á varnir fagfólks, þekkingu þess á efnum og innihaldi, rýni og öflun upplýsinga og þannig auka þrýsting á framleiðendur að nota vandaðri efni. Mikið er um „grænþvott“ þar sem vara er gefin út fyrir að vera „græn“, lífræn eða náttúruleg þó innihaldslýsing gefi hið andstæða til kynna.

Samnorrænt þróunarverkefni

Sjálfbær þróun í hársnyrtiiðn (Sustainable development in hairdressing) er heiti á samnorrænu þróunarverkefni sem Tækniskólinn – skóli atvinnulífsins er aðili að. Verkefnið er styrkt með sjóðum Evrópusambandsins (Leonardo) og þátttökulöndin eru auk Íslands Finnland, Danmörk, Noregur og Svíþjóð. Markmið verkefnisins er að þróa samræmt nám og samræmd matsviðmið í umhverfisvænni hárumhirðu, allt frá grunnhugmyndum um sjálfbæra þróun í hársnyrtingu til heildstæðrar „grænnar“ hársnyrtibrautar í þeim tilgangi að bæta valmöguleika, umhverfisvitund, þekkingu, heilsu og starfsframtíð fagfólks í hársnyrtifaginu og auka öryggi viðskiptavina þeirra. Verkefnið fór af stað haustið 2011 og því lýkur í september 2014.

Kjarnahópurinn kemur saman fimm sinnum á tímabilinu og miðlar þeirri þekkingu sem til er í hverju landi. Þátttakendur hafa hver í sínu heimalandi sett saman tilraunahóp kennara, nemenda og fagfólks þar sem upplýsingarnar og verkefnin eru mátuð og rædd með það í huga að meta hvort og hvernig þau passa inn í námskrá greinarinnar og geta orðið framtíð fagsins til framdráttar. Markmiðið er einnig að koma á fót upplýsingabanka til að dreifa upplýsingum og þekkingu.

Þessu verkefni lýkur næsta haust. Hársnyrtinámið er þegar farið að litast af þeim upplýsingum og áherslum sem verkefnið hefur alið af sér og munu í framhaldinu eiga sinn sess á hársnyrtibraut. Menntað fagfólk greinarinnar mun með upplýstum hætti velja hvaða stefnu það vill taka í faginu og hvaða efni það kýs að starfa með og byggir það val á rýni og þekkingu. Þannig mun skapast aukið jafnvægi á milli menntunar, atvinnulífs, umhverfis og heilsu fagfólks til framtíðar.

Lesendur Vísis geta sent inn greinar á greinar@visir.is. Greinunum þarf að fylgja mynd af höfundi.




Skoðun

Skoðun

Er þetta eðli­legt?

Guðrún Árnadóttir,Guðrún Tara Sveinsdóttir,Hekla Kollmar,Þorgerður Jörundsdóttir skrifar

Sjá meira


×