Viðskipti innlent

Síminn gæti þurft að greiða fjóra milljarða í skaðabætur

ingvar haraldsson skrifar
Orri Hauksson, forstjóri Símans, og aðrir stjórnendur telja Símann ekki þurfa að greiða háar fjárhæðir í skaðabætur.
Orri Hauksson, forstjóri Símans, og aðrir stjórnendur telja Símann ekki þurfa að greiða háar fjárhæðir í skaðabætur. vísir/pjetur
Síminn gæti þurft að greiða fjóra milljarða króna í skaðabætur tapi hann þrem dómsmálum sem rekin eru gegn fyrirtækinu.

Samkvæmt því sem kemur fram í árshlutauppgjöri Símans fara Fjarskipti, móður­félag Vodafone, fram á ríflega 900 milljónir króna í skaðabætur vegna meints ólögmæts verðþrýstings. Þá hafa Inter, samtök aðila er veita internetþjónustu, stefnt Símanum og krefjast þriggja milljarða króna skaðabóta vegna meintra brota á samkeppnislögum. TSC, sem starfar á Snæfellsnesi, hefur stefnt félaginu til greiðslu skaðabóta vegna samkeppnislagabrota.

Síminn hefur hafnað málatilbúnaði í öllum málunum og gagnstefnt Fjarskiptum. Í árshlutauppgjörinu kemur fram að stjórnendur Símans telji ekki að koma muni til verulegra fjárútláta vegna málaferlanna.



Uppfært 7. september 
EiríkurGunnsteinsson, lögmaður Inter, hefur sent frá sér yfirlýsingu vegnamálsins.



Yfirlýsingin í heild sinni:



Í mars 2013 gerðu Samkeppniseftirlitið og Skipti með sér sátt vegna samkeppnisbrota Símans á nærri tíu ára tímabili. Jafnframt féllust Skipti á að greiða stjórnvaldsekt að fjárhæð kr. 300 milljónir vegna umræddra brota. Stór hluti umræddra samkeppnisbrota beindust gegn minni aðilum á fjarskiptamarkaði en flestir þessara aðila eru í samtökum sem kalla sig INTER, samtök aðila er veita internetþjónustu.

Á árinu 2014 fékk INTER óháðan rekstrarhagfræðing til að meta tjón INTER félaga vegna umræddra brota og byggði mat hans m.a. á þeim opinberu gögnum sem lágu fyrir hjá Póst-og fjarskiptastofnun. Niðurstaðan var sú að tjón umræddra aðila væri á bilinu frá 2-4 milljörðum króna eftir því hvaða forsendum byggt væri á. Kröfubréf var sent á Símann en kröfunni var hafnað af lögmanni hans á þeim grundvelli að Síminn teldi skilyrði skaðabótaábyrgðar ekki fyrir hendi. Í kjölfarið var leitað sátta en árangur af sáttaviðræðum var enginn.

Það er rangt sem segir í árshlutauppgjöri Símans, og fram kom í frétt á visir.is þann 3. september sl., að INTER hafi stefnt Símanum og málatilbúnaði INTER hafi verið hafnað þar. Þrjú félög innan INTER hafa hins vegar hafið undirbúning að málsókn og verða matsbeiðnir lagðar fram í héraðsdómi á næstunni til að fá mat á því tjóni sem umræddir aðilar hafa orðið fyrir. Þessir aðilar eru minni fjarskiptafyrirtæki, sem starfað hafa m.a. á landsbyggðinni, og hafa orðið fyrir tugmilljóna tjóni árlega á u.þ.b. tíu ára tímabili vegna samkeppnisbrota og má búast við að sá tekjumissir verði til framtíðar.

Þegar niðurstaða þeirra matsmála liggur fyrir verður Símanum stefnt til greiðslu skaðabóta vegna ofangreindra samkeppnisbrota.






Fleiri fréttir

Sjá meira


×