Viðskipti innlent

Síldin einstaklega góð sem veiðist nú við Snæfellsnes

Kristján Már Unnarsson skrifar
Ráðamenn Loðnuvinnslunnar á Fáskrúðsfirði segja að síldin sem nú veiðist út af Snæfellsnesi sé einstaklega góð, - þeir hafa ekki séð svo vel á sig komna síld í nokkur ár.  Þetta kom fram í fréttum Stöðvar 2 í viðtali við þá Friðrik Mar Guðmundsson, framkvæmdastjóra Loðnuvinnslunnar, og Grétar Arnþórsson, verkstjóra hjá Loðnuvinnslunni.

Landað úr Hoffelli á Fáskrúðsfirði. Gamla Hoffell liggur fyrir aftan nýja skipið.Stöð 2/Egill Aðalsteinsson.
Hoffell, nýjasta stolt Fáskrúðsfirðinga, var að landa tæpum 800 hundruð tonnum sem skipið veiddi á síldarmiðunum út af Snæfellsnesi.

„Einstaklega góð síld," sagði Friðrik Mar. „Síldin hefur verið 320-330 grömm meðalvigt, bráðfeit og óvenju vel á sig komin á þessum tíma. Við höfum ekki séð svona vel haldna síld á þessum tíma í nokkur ár." 

Síldin er öll unnin í landi til manneldis hjá Loðnuvinnslunni, ýmist fryst eða söltuð, og fer til kaupenda á Norðurlöndum og í Kanada. 



Öflugt kælikerfi nýja skipsins skilar síldinni í land við mínus eina gráðu og fyrir vinnsluna skiptir einnig verulegu máli að fá hana hæfilega feita, eins og hún er þessa dagana, að sögn Friðriks.

Um 140 manns starfa hjá Loðnuvinnslunni og má því ætla að nánast annar hver vinnandi maður í þessari 700 manna byggð starfi hjá fyrirtækinu.

Síldin er öll unnin til manneldis á Fáskrúðsfirði.Stöð 2/Egill Aðalsteinsson.

Tengdar fréttir






Fleiri fréttir

Sjá meira


×