Sif nýr formaður Dýraverndunarsambandsins

Sif Traustadóttir gjörsigraði Árna Stefán Árnason í formannskosningum til Dýraverndunarsambandsins á aðalfundi sambandsins sem haldinn var í Norræna húsinu í dag.

Sif hlaut 105 atkvæði á meðan Árni Stefán fékk 29 atkvæði. Sif er fyrrverandi formaður Dýralæknafélags Íslands og sat í nefnd sem skipuð var af umhverfisráðherra til að endurskoða frá grunni dýravelferðarlögin.

Árni Stefán lauk lögfræðigráðu sinni á síðasta ári og hefur sérhæft sig í dýrarétti. Hann hefur meðal annars starfað fyrir Kattavinafélag Íslands.

Fjöldi félagsmanna hafði lengi verið svipaður og voru í síðustu viku um 150 félagsmenn skráðir. Á liðinni viku hefur fjöldinn tæplega tvöfaldast og þegar hætt var að taka við nýjum skráningum fyrir aðalfundinn í gær voru félagsmenn orðnir um 275.

Fráfarandi formaður er Ólafur Dýrmundsson.