Erlent

Sendu þúsundir eintaka af Newsweek í verslanir með Hillary sem forseta á forsíðu

Birgir Olgeirsson skrifar
Forsíðan og grein blaðsins um sigur Hillary Clinton í forsetakosningunum.
Forsíðan og grein blaðsins um sigur Hillary Clinton í forsetakosningunum. Vísir/Twitter
Innkalla þurfti 125 þúsund eintök af sérblaði Newsweek um forsetakosningarnar í Bandaríkjunum því á forsíðu þess var mynd af Hillary Clinton, forsetaefni Demókrata, undir fyrirsögninni „Madam President“ eða „Frú forseti“.

„Líkt og allir aðrir, höfðum við rangt fyrir okkur,“ er haft eftir Tony Romando, framkvæmdastjóra útgáfufélagsins Topix Media, sem sá um þetta sérblað Newsweek um forsetakosningarnar í Bandaríkjunum.

Newsweek sjálft vakti máls á þessu síðastliðinn mánudag, líkt og sjá má í tístinu hér fyrir neðan, en benti á að Topix Media bæri ábyrgð á þessu og að öllum spurningum ætti að beina þangað. 

Prentmiðlar hafa oft þann háttinn á við kosningar í Bandaríkjunum að útbúa tvær forsíður fyrir útgáfudag þar sem annars vegar frambjóðandi Demókrata er kynntur sem næsti forseti Bandaríkjanna eða frambjóðandi Repúblikana. Með þessum hætti er hægt að vera með tilbúna forsíðu og eintak af blaðinu þegar úrslitin liggja mögulega fyrir um miðja nótt og starfsmenn þurfa að koma blaði út með miklum hraði.

Stjórnendur hjá Topex Media gerðu það, eina forsíðu með Donald Trump og aðra með Hillary Clinton, en virtust svo vissir í sinni sök með sigur Hillary Clinton að þeir sendu 125 þúsund eintök af sérblaði Newsweek með Clinton sem forseta á forsíðunni út úr húsi áður en Bandaríkjamenn mættu á kjörstað og áður en atkvæðin voru talin.

Topix Media sá fljótlega að það hefði gert mistök og bað alla þá sem höfðu ætlað sér að selja blaðið að setja það ekki á sölu, en New York Post greinir frá því að sautján eintök hefðu selst, af þeim 125 þúsund eintök sem fóru úr húsi.

Það var nóg til þess að myndir fóru að birtast á Internetinu af forsíðu blaðsins, sem mörgum þótti sönnun þess að fjölmiðlar ytra væru með Clinton í liði. En inni í blaðinu mátti líka finna ítarlega grein um það hvernig Hillary átti að hafa unnið sigur gegn Trump í kosningunum.

„Hin nýkjörna Hillary Clinton „fór hátt“ þegar andstæðingar hennar fóru jafnvel lægra sem varð til þess að á kjördag höfnuðu Bandaríkjamenn um land allt þeim ótta og hatri sem Donald Trump bauð upp á. Hæsta glerþak vestrænnar menningar hefur verið rofið,“ segir í greininni.

Þetta er sagt minna á þegar Chicago Daily Tribune ákvað að birta forsíðufyrirsögnina „Deway Defeats Truman“ eftir forsetakosningarnar í Bandaríkjunum árið 1948.

Það var hins vegar þannig að Harry Truman vann Thomas Dewey í forsetakosningunum það árið. Eintak af blaðinu með þessari fyrirsögn rataði í hendur Trumans sem rétti hana brosandi til lofts því Chicago Daily Tribune hafði stutt Dewey og gengið svo langt að kalla Harry Truman fávita.

Harry Truman með forsíðuna frægu.Vísir/Getty

Tengdar fréttir

Trump lofar að sýna öllum sanngirni

Donald Trump verður næsti forseti Bandaríkjanna og heitir því að verða forseti allra Bandaríkjamanna. Hillary Clinton, sem tapaði þrátt fyrir að hafa fengið fleiri atkvæði, vonast til þess að hann muni reynast vel en segir úrslitin sár

10 hlutir sem Trump hefur sagst ætla að gera sem forseti

Donald Trump boðaði miklar breytingar í bandarískum þjóðfélagsmálum í kosningabaráttu sinni til forseta Bandaríkjanna. Hvort hann standi við loforð sín, eins og að hefja á ný vatnspyndingar eða banna múslimum að koma til Bandaríkjanna.




Fleiri fréttir

Sjá meira


×