Scolari hefur skilað góðu starfi

Þrátt fyrir afhroðið sem brasilíska landsliðið beið gegn því þýska í undanúrslitum HM í knattspyrnu á þriðjudaginn hefur verðandi forseti brasilíska knattspyrnusambandsins lýst yfir stuðningi við Luiz Felipe Scolari, þjálfara liðsins.

Marco Polo Nero, sem tekur við forsetaembættinu af José María Marín á næsta ári, segir að þótt úrslitin á þriðjudaginn hafi verið slæm, þá megi ekki mála skrattann á vegginn.

"Að mínu mati á hann (Scolari) að halda áfram.

"Það sem gerðist í leiknum gegn Þýskalandi voru taktísk mistök. Það var meinið. En við gerum öll mistök - það getur hent hvern sem er," sagði Polo Nero sem var kjörinn forseti brasilíska knattspyrnusambandsins með miklum meirihluta atkvæða á fyrr á þessu ári.

Og Polo Nero bætti við: "Það mikilvægasta er að Scolari hefur skilað góðu starfi. Mótið og undirbúningurinn gengu vel. Grunnurinn er til staðar."

Sjálfur hefur Scolari, sem gerði Brasilíu að heimsmeisturum árið 2002, sagt að hann muni ekki stíga frá borði, en þjálfarinn mun funda með núverandi og verðandi forsetum brasilíska knattspyrnusambandsins eftir HM sem lýkur á morgun með úrslitaleik Þýskalands og Argentínu á Maracana vellinum í Ríó de Janeiro.

Brasilía mætir Hollandi í leiknum um þriðja sætið í Brasilíuborg í kvöld.