Schmeichel hvetur Van Gaal til að krækja í Zlatan

Manchester United goðsögnin, Peter Schmeichel, hefur hvatt Louis van Gaal til þess að gera tilboð í sænska framherja PSG, Zlatan Ibrahimovic. Zlatan hefur spilað með liðum á borð við Ajax, Juventus og Barcelona, en aldrei spilað í ensku úrvalsdeildinni.

Zlatan er með samning við Parísar-liðið til sumarsins 2016, en van Gaal er talinn stórhuga fyrir komandi sumar og vill hann semja við nokkra heita bita á markaðnum. Schmeichel segir að Zlatan geti haft jafn góð áhrif og Cantona hafði á United á sínum tíma.

„Síðasta sumar voru orðrómar um að Zlatan myndi fara í United. Ég sagði þá að Zlatan væri byggður til þess að vera í þessum klúbb, hann væri fæddur til að spila þarna,” sagði Schmeichel við L’Equipe.

„Afhverju var Cantona svona sterkur persónuleiki í United, en ekki í Leeds og öllum liðunum í Frakklandi? Afhverju? Af því þetta er Manchester United. Í Manchester þá er þér gefið frelsi sem leikmaður, en einnig ábyrgð.”

„Okkur er sama hver þú ert eða hvað þú elskar að gera, við lítum til þess hvað þú gerir á vellinum og hvaða áhrif þú hefur á liðið. Ef þú kannt ekki að meta það, þá ferðu,” sagði danska goðsögnin og bætti við að lokum:

„En þú getur verið með allskyns persónuleika. Beckham, Cantona.. þeir fóru út á völlinn og gerðu sitt besta. Það eru hundruð leikmanna sem fara út og vilja vera eins og Beckham og Cantona, en hafa ekki persónuleika þeirra og mistekst.”