Innlent

Sandgerðisbær: Úttekt verði gerð á að flytja flugið til Keflavíkurflugvallar

Atli Ísleifsson skrifar
Stærstur hluti alþjóðaflugvallarins er í landi Sandgerðisbæjar.
Stærstur hluti alþjóðaflugvallarins er í landi Sandgerðisbæjar. Vísir/Valli
Bæjarráð Sandgerðisbæjar segir það vekja furðu að Rögnunefndin hafi ekki haft núverandi millilandaflugvöll á Miðnesheiði sem einn þeirra valkosta sem var metinn við skoðun á flugvallarkostum á höfuðborgarsvæðinu.

Í bókun kemur fram að bæjarráð telji rétt að ef flytja eigi innanlandsflug úr Vatnsmýrinni liggi beint við að næst verði gerð nákvæm úttekt á því að flytja innanlandsflugið á núverandi alþjóðaflugvöll í stað þess að fara strax í að fullkanna flugvallarskilyrði í Hvassahrauni eins og stýrihópurinn leggur til.

„Það er eðlileg krafa að slík úttekt sé gerð áður en hafist er handa við að reisa nýjan flugvöll frá grunni á svæði sem er einnig að hluta til á Suðurnesjum og einungis í um 15 mínútna akstursfjarlægð frá Flugstöð Leifs Eiríkssonar í Sandgerði. Bæjaryfirvöld eru tilbúin til að eiga aðkomu að slíkri úttekt, enda stærstur hluti alþjóðaflugvallarins í landi Sandgerðisbæjar.

Bæjarráð telur rétt að fela starfandi bæjarstjóra að kalla eftir kynningu á efni skýrslu stýrihópsins fyrir sveitarstjórnarfólk í Sandgerðisbæ,“ segir í bókuninni.


Tengdar fréttir

Nýr flugvöllur í Hvassahrauni gæti tekið við millilandaflugi

Innanlandsflugvöllur í Hvassahrauni gæti síðar þróast og orðið að alþjóðaflugvelli. Þetta er ein ástæða þess að Rögnunefndin mælir með Hvassahrauni. Ólíklegt er að samstaða náist um tillögu nefndarinnar á Alþingi.




Fleiri fréttir

Sjá meira


×