Innlent

Samkomulag um jarðvarma undirritað: „Gríðarlega stórt skref“

sunna karen sigurþórsdóttir skrifar
Skrifað var undir samninginn í Bláa lóninu í dag.
Skrifað var undir samninginn í Bláa lóninu í dag.
Samkomulag um samstarf milli jarðhitaklasa á Íslandi og í Frakklandi var undirritað í Bláa lóninu í dag. Samningurinn er gerður á milli franska jarðvarmaklasans og hins íslenska og fjallar meðal annars um samninga um jarðhitavirkjanir og fleira.

Ragnheiður Elín Árnadóttir, viðskipta- og iðnaðarráðherra, var viðstödd undirritunina. Hún segir að um stórt skref í samstarfi landanna tveggja sé að ræða og væntir mikils af samstarfinu.

„Þessi samningur getur verið mjög mikilvægur vettvangur til að koma að frekara samstarfi milli okkar, þá sérstaklega fyrirtækja í jarðvarmageiranum í þessum málaflokki. Við höfum á undanförnum árum og áratugum aflað okkur mikillar þekkingar og okkar fyrirtæki eru algjörlega á heimsmælikvarða,“ segir hún og bætir við að á alþjóðlegri jarðvarmaráðstefnu í Ástralíu fyrr á þessu ári hafi varla verið haldinn fyrirlestur án þess að Ísland bæri á góma.

Íslensk stjórnvöld koma þó ekki við sögu í samningagerðinni né undirrituninni, en höfðu þó einhverja aðkomu að samningnum, að sögn Ragnheiðar.

„Það sem stjórnvöld geta gert og ég hef lagt upp með í minni ráðherratíð er að opna dyr og fara fyrir þar sem þarf að hafa aðkomu stjórnvalda. Nú er orku- og umhverfismálaráðherra Frakklands hér á landi og við höfum átt þrjá fundi þar sem farið var yfir þessi mál. Þessi heimsókn hennar núna og þessi skref sem verið er að taka eru má segja afrakstur þess samtals og þeirrar vinnu sem innt hefur verið af hendi.“

Formenn franska og íslenska jarðvarðmaklasans, og Ségolene Royal orku- og umhverfismálaráðherra Frakklands undirrituðu samninginn við hátíðlega athöfn í Bláa lóninu í hádeginu í dag. Viðar Helgason, formaður íslenska jarðvarmaklasans, segir samninginn sögulegan.

„Þetta er stórt viðfangsefni sem mun taka mörg ár að vinna að, en getur haft í för með sér gríðarlegar breytingar á því hvernig menn nálgast ný jarðvarmaverkefni,“ segir hann.

„Það eru vel þekkt vandamál í jarðvarma við fjármögnun og undirbúning, bæði lagaleg vandamál, leyfisveitingatengt, í umhverismati, orkukaupssamningum og fleira sem hefur hrjáð og haldið aftur af jarðvarma í heiminum almennt. Klasarnir tveir komust að samkomulagi að taka á þessu sameiginlega og samingurinn snýst raunverulega um það. Þannig að þetta er gríðarlega stórt skref fyrir klasana og fyrirtækin,“ bætir hann við.




Fleiri fréttir

Sjá meira


×