Lífið

Safnarar sem framleiða dót fyrir safnara

Þau Bobby Breiðholt, Lóa Hjálmtýsdóttir og Rán Flygenring hafa öll mikinn áhuga á bæði smáhlutum og ís.
Þau Bobby Breiðholt, Lóa Hjálmtýsdóttir og Rán Flygenring hafa öll mikinn áhuga á bæði smáhlutum og ís. Vísir/Vilhelm
„Við erum öll forfallnir áráttusafnarar alls konar smádóts. Þegar maður var lítill var maður í því að safna alls konar; strokleðrum og svona og ég held að við höfum bara aldrei vaxið upp úr því. Við erum öll með hillur heima hjá okkur undir smádót, við erum alveg tryllt í þetta. Við erum öll safnarar, elskum litríkt smádót og erum öll teiknarar, þannig að það lá bara fyrir að við myndum gera þetta saman. Við ákváðum að stofna í kringum þetta félag sem við köllum Smádót. Planið er að gera meira en bara nælur – við elskum litla leikfangakalla og svona smádót í þeim dúr. Allt sem er lítið viljum við gera,“ segir Bobby Breiðholt, einn af aðstandendum Smádóts, samvinnufélags þriggja teiknara með söfnunaráráttu sem eru núna komnir út í hönnun og framleiðslu á dóti fyrir aðra að safna.

Fyrsta varan sem þau ætla að selja í kvöld verður litlar litríkar barmnælur. Nælurnar skarta fallegum ísum og í hverri nælu er skemmtileg vísun. Þarna er t.d. mjög bókstaflegur bragðarefur eftir Lóu Hjálmtýsdóttur, trúðaís eftir Rán Flygenring og yin og yang eftir Bobby Breiðholt sem bendir manni á að það verði ávallt að passa sig á að neyta íss og pitsu til jafns.

Smá brot úr nælusafninu hans Bobby.
„Það er komin svolítil sena í kringum svona nælur – t.d. á Insta­gram er hægt að fara á #PinGame og þar er hægt að sjá mikið af svona hipsteranælum. Þetta eru alls konar vísanir í poppkúltúr. Það eru komnar alls konar framleiðsluleiðir í þetta, þannig að við létum framleiða lítið „batch“ fyrir okkur. Við fórum í hugmyndavinnu og allar bestu hugmyndirnar snerust einhvern veginn um mat og ís og eitthvað þannig. Við ákváðum að hafa ísþema og köllum þetta Íspinna. Við seljum nælurnar saman í setti, allar þrjár nælurnar saman. Það verða bara til 50 sett og þetta verður allt númerað,“ segir Bobby spurður um hvers vegna þetta þema hafi orðið fyrir valinu.

Eins og áður sagði hefst útgáfuhófið klukkan 18.00 í Gallery Gallera, Laugavegi 33. Í boði verður ís frá Valdísi og allir eru velkomnir. Söfnurum er ráðlagt að mæta snemma því að þarna verður takmarkað upplag í boði. Nælurnar verða einungis seldar í setti þrjár saman og kostar settið 5.000 krónur.






Fleiri fréttir

Sjá meira


×