Viðskipti innlent

RÚV fær lengri greiðslufrest

Jón Hákon Halldórsson skrifar
Hugsanlegt er að Útvarpshúsið verði selt.
Hugsanlegt er að Útvarpshúsið verði selt. vísir/gva
Samkomulag hefur náðst milli RÚV og Lífeyrissjóðs starfsmanna ríksins, sem er eigandi að skuldabréfi í 1. flokki 2000, um framlengingu á fresti á greiðslu skuldabréfsins til 31. mars næstkomandi. þann 1. október síðastliðinn hafði verið samið um að fresturinn næði til 31. desember.

Í tilkynningu til Kauphallar segir að erfið fjárhagsstaða RÚV valdi því að ekki er bolmagn til að greiða afborgunina, en hún er að upphæð um 190 milljónir króna. Þar að auki er samkomulag um að kröfuhafar beiti ekki vanefndaúrræðum af þessu tilefni og að ekki verði gengið að eignum félagsins á þessu tímabili.  Frestunin mun því ekki hafa áhrif á kjör skuldabréfsins og mun sú fjárhæð sem frestast bera sömu kjör og skuldabréfið þennan tíma og ekki hafa í för með sér kostnað í formi dráttarvaxta eða vanskilagjalda.

„Stjórn RÚV vinnur nú að undirbúningi á sölu eigna félagsins með það að markmiði að minnka skuldsetningu félagsins. Stjórn RÚV tók ákvörðun á stjórnarfundi sínum þann 18. desember 2014 að hefja formlegt sölu- og skipulagsferli lóðarinnar að Efstaleiti 1 en borgarráð samþykkti á fundi í október að hefja vinnu með RÚV með það að markmiði að endurskipuleggja svæðið, m.a. fyrir íbúðabyggð,‟ segir í tilkynningunni.

Þá segir að Ríkisútvarpið hafi jafnframt til skoðunar frekari aðgerðir til þess að tryggja rekstrarhæfi félagsins, þar á meðal hugsanlega sölu Útvarpshússins. Unnið verðurr að þeim aðgerðum í samráði við stjórnvöld.






Fleiri fréttir

Sjá meira


×