Íslenski boltinn

Rúnar: Hafa verið þreifingar í gangi

Eiríkur Stefán Ásgeirsson skrifar
Rúnar Kristinsson, þjálfari KR.
Rúnar Kristinsson, þjálfari KR. Vísir/Stefán
Rúnar Kristinsson, þjálfari KR, er samkvæmt heimildum Vísis undir smásjá liða í Noregi. Sjálfur segir hann líklegra að hann verði áfram á Íslandi.

„Ég hef fengið eitt og eitt símtal frá umboðsmönnum og það hafa verið einhverjar þreifingar í gangi. Það er þó ekkert sem ég get greint frá nánar enda ekkert öruggt í þessum efnum,“ sagði Rúnar og bætti við að í sumar hafi borist fyrirspurn frá félagi í Evrópu.

„Það var ekki heppilegt fyrir mig þá að flytja mig um set. Sem stendur eru meiri líkur á því að ég verði áfram á Íslandi.“

„Þegar þjálfarastöður losnar er stundum bent á mig og þá skoðar maður bara þær fyrirspurnir sem berast. En ég hef alltaf sett KR í fyrsta sætið - aðaláherslan hjá mér er að klára tímabilið og gera það með sóma.“

Samningur Rúnars við KR rennur út eftir tímabilið og hann hefur átt í viðræðum við forráðamenn félagsins um áframhaldandi samstarf. „Ég þarf að taka ákvörðun fljótlega. Við munum klára tímabilið og svo setjumst við niður og ræðum málin.“

Rúnar tók við KR á miðju tímabili 2010 og að því loknu bauðst honum langtímasamningur við KR. „Ég hafði ekki ætlað mér að fara svo snemma út í þjálfun en eftir að hafa hugsað málið vel og lengi ákvað ég að hella mér út í þetta,“ sagði hann en nýverið útskrifaðist hann með UEFA Pro License þjálfaragráðu frá enska knattspyrnusambandinu.

„Það er ástæðan fyrir því að ég er hér að mennta mig. Ég stefni að því að flytja frá Íslandi í framtíðinni og þjálfa í Evrópu,“ sagði hann í viðtali á heimasíðu enska sambandsins þá. Hann tekur undir þau orð nú.

„Ég vil komst eins langt í þessu og mögulegt er og því þurfti ég að vera með tilskilin réttindi. En það er ekki þar með sagt að ég muni stökkva á hvað sem er - ég þarf að velja rétt.“

Rúnar lék áður með Lilleström í Noregi og Lokeren í Belgíu og hefur reglulega verið orðaður við bæði lið undanfarin ár.


Tengdar fréttir




Fleiri fréttir

Sjá meira


×