Formúla 1

Rosberg: Næsta skref er að einbeita mér eingöngu að því að vera faðir og eiginmaður

Kristinn Ásgeir Gylfason skrifar
Rosberg fagnar titlinum fyrir fimm dögum síðan.
Rosberg fagnar titlinum fyrir fimm dögum síðan. Vísir/Getty
Nico Rosberg sem tryggði sér sinn fyrsta heimsmeistaratitil ökumanna um síðustu helgi tilkynnti óvænt í dag að hann sé hættur keppni í Formúlu 1.

Rosberg tilkynnti þetta á blaðamannafundi sem haldin var í tilefni af því að í kvöld fær hann bikarinn formlega afhendann við hátíðlega athöfn í Vín í Austurríki.

Kappakstursheimurinn er sleginn yfir óvæntum tíðindum dagsins. Rosberg er fyrsti ríkjandi heimsmeistarinn til að hætta síðan Alain Prost gerði það árið 1993.

Ástæðurnar sem Rosberg gaf á fundinum voru meðal annars að tímabilið hefði tekið verulega á og hann hefði ekki getað sinnt fjölskyldu sinni eins og hann vildi. Eins sagði heimsmeistarinn að hann hefði alltaf haft þann draum að verða heimsmeistari í Formúlu 1 og sá draumur væri nú orðinn að veruleika.

„Næsta skref er að einbeita mér eingöngu að því að vera faðir og eiginmaður í bili. Ég hlakka mjög mikið til þess,“ sagði Rosberg.

„Það þarf mikinn kjark í að taka svona ákvörðun og sýnir hún hvernig mann Nico hefur að geyma. Hann er að hætta á toppi ferilsins, sem heimsmeistari, hann hefur nú náð markmiðinu sem hann setti sér í æsku. Hann var svo skýr með þessa hugsun þegar hann tilkynnti mér þetta fyrst að ég tók þessu strax sem raunverulegu.

Nico hefur verið gríðarlega mikill keppnismaður og komið til baka eftir erfiða tíma á ferlingum og verið okkur innblástur. Hann hefur unnið sér inn mikla virðingu innan íþróttarinnar og gefið sig allan til liðsins síðan 2010. Við viljum einfaldlega þakka honum fyrir hans magnaða framlag til þess árangurs sem við höfum náð. Hann hefur ekið með tveimur af allra bestu ökumönnum sögunnar, Michael [Schumacher] og Lewis [Hamilton],“ sagði Toto Wolff, liðsstjóri Mercedes.

Rosberg hóf keppni í Formúlu 1 árið 2006 með Williams liðinu.Vísir/Getty
Stólaleikurinn um sæti hjá Mercedes

Mercedes liðið þarf nú að finna annan ökumann í stað Rosberg. Síminn hjá Wolff hefur líklega ekki stoppað mikið síðan tilkynningin kom fyrr í dag.

Þegar eru uppi sögur um hver hreppir hnossið ef svo má segja, enda líklega eftirsóknarverðasta kappaksturssæti í heiminum að losna.

Fernando Alonso, Sebastian Vettel, Valtteri Bottas og fleiri hafa verið nefndir sem mögulegir ökumenn í sætið. Fleiri geta þó komið til greina en það mun væntanlega skýrast á næstu dögum. Stólaleikurinn hefst þá frá og með deginum í dag.

Lewis Hamilton, nú fyrrum liðsfélagi Rosberg hefur sagt að honum sé sama hver tekur við sæti Rosberg.

„Þetta kemur mér ekki á óvart,“ sagði Hamilton.

„Það verður skrýtið og sorglegt að hafa hann ekki með á næsta ári,“ bætti Hamilton við.

Hamilton bætti við að ef liðið vildi leita ráða hjá honum um hver ætti að fá sætið þá myndi hann veita aðstoð sína en annars væri honum sama.

Niki Lauda, sérstakur ráðgjafi Mercedes liðsins í Formúlu 1 segir að það verði raunverulega vandamál að finna ökumann í sætið sem Rosberg skilur eftir sig autt.

„Við vorum með besta mögulega ökumannsparið sem við gátum haft. Við vissum hvað við höfðum með Lewis og Nico,“ sagði þrefaldi heimsmeistarinn.

„Nico kom okkur á óvart. Kappakstursökumenn hætta þegar þeir vilja hætta. Það er ekkert utanaðkomandi sem getur haft áhrif á þá niðurstöðu þeirra,“ bætti Lauda við.

Martin Brundle, fyrrum ökumaður í Formúlu 1 og einn sérfræðinga Sky Sports sagði í viðtali fyrr í dag að hann ætti erfitt með að trúa þessu.

„Ég hélt fyrst að þetta væri aprílgabb en það er ekki fyrsti apríl. Þetta kemur mjög á óvart. Hann hefur greinilega fengið nóg. Hann er ekki úr sér genginn. Hann er í góðu formi og er fljótur,“ sagði Brundle.

Spretthlaups-konungurinn Usain Bolt var hissa á ákvörðun Rosberg. „Ég skil ekki ákvörðunina. Það hafa allir sínar ástæður en ég hreinlega skil þetta ekki. Ætli honum hafi ekki bara liðið eins og hann hafi afrekað það sem hann ætlaði að afreka,“ sagði Bolt.


Tengdar fréttir

Herra og frú heimsmeistari

Nico Rosberg tryggði sér í gær heimsmeistaratitilinn í formúlu eitt í fyrsta sinn með því að ná öðru sæti í lokakappakstrinum í Abú Dabí.

Bílskúrinn: Einvígið í Abú Dabí

Nico Rosberg, ökumaður Mercedes liðsins varð heimsmeistari ökumanna með því að koma annar í mark í Abú Dabí. Liðsfélagi hans og fyrrum heimsmeistari, Lewis Hamilton gerði allt sem hann gat til tryggja sér titilinn en allt kom fyrir ekki.




Fleiri fréttir

Sjá meira


×