Risaskip í Sundahöfn

Skemmtiferðaskipið Grand Princess kom til hafnar að Skarfabakka í Reykjavík nú í morgun. Skipið er stærsta skemmtiferðaskip sem hefur nokkru sinni komið til Íslands, alls 108.806 brúttólestir, 290 metra langt og ristir 8 metra. Skipið kom síðast hingað til lands árið 2004. Farþegafjöldi er um 3.100 og áhöfn telur um 1.100 manns.

Í tilkynningu frá Samskipum, sem þjónusta skipið hér á landi segir að skipið sé í eigu Princess Cruises, sem er dótturfélag Carnival Cruises sem er stærsta skemmtiferðaskipafélag í heimi. Skipið var tekið í notkun 1998.

„Til samanburðar má geta þess að Queen Elisabeth sem var hér á dögunum er um 70.000 brúttólestir," segir í tilkynningunni. Skipið var á Akureyri í gær og kom þangað frá Noregi og Englandi.