Ríkislögreglustjóri með mál Byrgisins

Ríkissaksóknari hefur vísað máli Byrgisins, sem Ríkisendurskoðun mælti fyrir að yrði skoðað af ríkissaksóknara, til efnahagsbrotadeildar Ríkislögreglustjóra. Þetta staðfesti Helgi Magnús Gunnarsson, saksóknari í efnahagsbrotadeild hjá Ríkislögreglustjóra, í gær.

Eins og greint var frá í fjölmiðlum í gær gerði Ríkis-endurskoðun athugasemdir við fjármál meðferðarheimilisins Byrgisins á árunum 2005 og 2006. Í skýrslunni kemur meðal annars fram að ekki hafi verið gerð grein fyrir því hvernig rúmlega 45 milljónum króna hafi verið ráðstafað.
Bókhald Byrgisins er í skýrslunni sagt í molum og fjárreiður Byrgisins augljóslega samofnar einkaneyslu starfsmanna, að mestu leyti Guðmundar Jónssonar, sem nýlega hætti störfum sem forstöðumaður Byrgisins.

Meðal annars voru 122 þúsund krónur millifærðar af söfnunarreikningi, sem stofnaður var eftir að fyrrverandi skjólstæðingur Byrgisins, Haukur Freyr Ágústsson, lést vegna ofneyslu fíkniefna, yfir á persónulegan reikning Guðmundar Jónssonar.

Starfsmenn Ríkisendurskoðunar hafa þegar fundað með starfsmönnum félagsmálaráðuneytisins vegna málefna Byrgisins með það að markmiði að taka starfslag og verkferla til endurskoðunar, svo fjármálamisferli af því tagi sem upp hefur komist um endurtaki sig ekki.

Vistmennirnir í Byrginu, sem voru sex þegar tekin var ákvörðun um að leggja starfsemina niður eftir að skýrsla Ríkisendurskoðunar kom fram, hefur verið boðið að fara á Hlaðgerðarkot. Það er sjúkrastofnun sem býður upp á stífa meðferð fyrir langt leidda fíkniefnaneytendur en Samhjálp og velferðarsvið Reykjavíkurborgar munu vinna í sameiningu að því að taka við verkefnum sem Byrgið var með.

Heiðar Guðnason, forstöðumaður Samhjálpar, segir enn óljóst hvort Samhjálp geti tekið við öllum þeim vistmönnum sem hafa verið í Byrginu.
Á ríkisstjórnarfundi í gær voru málefni langt leiddra vímuefnaneytenda tekin til umfjöllunar að tillögu Björns Bjarnasonar dómsmálaráðherra. Skipaður hefur verið starfshópur, undir forystu Stefáns Eiríkssonar lögreglustjóra höfuðborgarsvæðisins, til þess að fjalla um málefni langt leiddra vímuefnaneytenda á víðum grunni. Í hópnum eru einnig fulltrúar frá heilbrigðis- og tryggingarmálaráðuneyti og félagsmálaráðuneytinu.