Innlent

Reynt að freista fyrirtækja til framkvæmda með ívilnunum

Heimir Már Pétursson skrifar
Ríkisstjórnin samþykkti í morgun frumvarp um ívilnanir til fyrirtækja vegna nýfjárfestinga sem fela í sér lægri tekjuskatt og 50 prósenta afslátt af tryggingagjaldi og fasteignaskatti í allt að 13 ár. Iðnaðarráðherra segir markmiðið að efla nýfjárfestingu í atvinnurekstri, bæta samkeppnishæfni Íslands og styrkja byggðaþróun.

Frumvarpið sem iðnaðarráðherra fékk samþykkt í ríkisstjórn í morgun felur í sér rammalöggjöf utan um ívilnanir til fyrirtækja. Iðnaðarráðherra vonar að frumvarpið verði að lögum fyrir sumarleyfi Alþingis.

Enda hafi bæði þingmenn Samfylkingarinnar og Vinstri grænna kallað eftir löggjöf sem þessari. Iðanaðarráðherra segir frumvarinu ekki ætlað ekki að höfða til tiltekinna fyrirtækja frekar en annarra.

„Heldur á þetta við um fyrirtæki sem hyggja á nýfjárfestingu hér, hvort sem það eru innlend eða erlend fyrirtæki að uppfylltum ákveðnum skilyrðum,“ segir Ragnheiður Elín Árnadóttir iðnaðarráðherra.

Þá sé frumvarpið byggðatengt og miðað við byggðakort Evrópusambandsins og eigi því við um fjárfestingar í landsbyggðarkjördæmunum þremur.

„Stærðarmörkin eru að það verði að vera meiri en 300 milljóna fjárfesting og störfin þurfa að vera fleiri en tuttugu,“ segir ráðherra.

Fyrirtæki sem uppfylli skilyrði laganna geti fengið 50 prósenta afslátt af tryggingagjaldi og fasteigasköttum og tekjuskatturinn verði 15 prósent til tíu ára en  aldrei lengur en til 13 ár frá undirritun samnings.

„Þarna erum við að gera það sem öll önnur ríki eru að gera. Ég myndi persónulega og prívat vilja hafa það þannig að þetta ætti við um öll fyrirtæki, að við værum að horfa á almenna skattkerfið með þessum hætti. En því miður erum við ekki þar alveg strax en stefnum þangað. Þannig að við erum að keppa um nýfjárfestingu í heimi þar sem öll önnur lönd eru að bjóða einhvers konar ívilnanir,“ segir Ragnheiður Elín Árnadóttir.






Fleiri fréttir

Sjá meira


×