Formúla 1

Renault tekur yfir Lotus í næstu viku

Kristinn Ásgeir Gylfason skrifar
Lotus-Renault gekk vel síðast þegar þessir aðilar unnu saman. Kannski smellur þetta saman aftur hjá þeim.
Lotus-Renault gekk vel síðast þegar þessir aðilar unnu saman. Kannski smellur þetta saman aftur hjá þeim. Vísir/Getty
Renault mun klára að taka yfir Lotus liðið í Formúlu 1 í næstu viku. Franski bílaframleiðandinn verður þá orðinn liðseigandi aftur í Formúlu 1.

Red Bull og Toro Rosso nota Renault vélar sem sætt hafa mikilli gagnrýni í ár og í fyrra. Skortur á afli er helsta uppspretta gagnrýninnar.

Renault mat þrjá kosti: hætta alfarið í Formúlu 1, halda áfram sem vélaframleiðandi eða snúa aftur sem eigandi og rekandi eigin liðs.

Nú er svo komið ef marka má frétt Autosport að Renault mun kaupa stóran hluta Lotus liðsins, sem hét áður Renault. Þetta gerist í kjölfar nokkurra mánaða samningaviðræðna og fjárhagsvandræða Lotus liðsins. Bílar þess voru kyrrsettir á Spa brautinni eftir kappaksturinn síðustu helgi og voru fyrir skemmstu leystir út.

Samkvæmt heimildum Autosport mun Renault fara með 65 prósent eignarhlut í liðinu. Greiðslur fyrir hlutinn dreifast yfir tíu ár og nema 11,5 milljónum dollara á ári (1,5 milljarður) íslenskra króna).

Talið er að fjórfaldur heimsmeistari og fulltrúi Renault, Alain Prost muni sjálfur taka stóran þátt í rekstri liðsins og eiga 10 prósent hlut. Gerard Lopez, núverandi eigandi liðsins situr þá eftir með 25 prósent.

Heimildir Autosport herma að samningar verði undirritaðir á mánudag.

Eigendaskiptin munu taka gildi frá næstu áramótum. Renault hefur enn ekki ákveðið hvernig leyst verði úr skuldbindingum liðsins gagnvart Red Bull á næsta ári. Red Bull hefur forgangsákvæði í sínum samningi sem þýðir að það myndi ganga framar eigin liði Renault ef eitthvað vandamál kæmi upp.

Einn möguleikinn er þá að Lotus noti Mercedes vélar áfram, þangað til samningur liðsins við Mercedes rennur út, eftir næsta tímabil. Það gæti verið lærdómsríkt fyrir Renault að reka lið með Mercedes vélar, sem eru án vafa þær bestu í bransanum þessi misserin. Spurningin er hvort Mercedes sé tilbuið að heimila slíkt.

Þessi eigendaskipti gætu haft í för með sér breytingu á liðsskipan hjá Lotus/Renault. Líklega heldur franski ökumaðurinn Romain Grosjean sæti sínu þegar franski bílaframleiðandinn tekur yfir. Annað gæti gilt um hinn umdeilda liðsfélaga hans, Pastor Maldonado. Hann gæti þurft að taka pokann sinn. Þetta er þó óvíst og um getgátur að ræða.


Tengdar fréttir

Bílskúrinn: Baráttan í Belgíu

Lewis Hamilton er nú búinn að tryggja sér ráspólsbikar ársins. Óvæntir atburðir áttu sér stað í belgíska kappakstrinum.

Lewis Hamilton vann í Belgíu

Lewis Hamilton á Mercedes vann á Spa brautinni í Belgíu. Liðsfélagi hans Nico Rosberg varð annar og Romain Grosjean á Lotus varð þriðji.

Whiting: Honda misnotaði reglurnar

Regluvörður Alþjóða akstursíþróttasambandsins, FIA, Charlie Whiting segir McLaren-Honda hafa misnotað reglurnar um refsingar fyrir ofnotkun vélaíhluta í Belgíu.




Fleiri fréttir

Sjá meira


×