Innlent

Reiðarslag fyrir Skagamenn: „Það búast allir við hinu versta á miðvikudaginn“

Kolbeinn Tumi Daðason skrifar
Jónína Björg Magnúsdóttir er líklegast frægasta fiskverkunarkona landsins.
Jónína Björg Magnúsdóttir er líklegast frægasta fiskverkunarkona landsins. Vísir
„Fólk var bara mjög slegið og mikil þögn. Það var ekki klappað fyrir forstjóranum í þetta skiptið,“ segir Jónína Björg Magnúsdóttir, fiskverkakona hjá HB Granda á Akranesi. Hún var nýkomin af starfsmannafundi með forstjóranum Vilhjálmi Vilhjálmssyni sem boðað var til fyrir blaðamannafundinn á Akranesi nú síðdegis.

HB Grandi hyggst láta af botnfiskvinnslu á Akranesi en þar eru 93 starfsmenn. Líklega um áttatíu prósent konur að sögn Jónínu. Óróleika hafi gætt á Akranesi um helgina eftir pistil Vilhjálms Birgissonar verkalýðsforingja um óveðurský yfir Skipaskaga. 

Sumir hafa tengt pistil Vilhjálms við sólarkísilverksmiðjuna að sögn Jónínu en svo hafi málin skýrst í dag.

Blaðamannafundinn á Akranesi, sem var í beinni útsendingu á Vísi, má sjá hér að neðan.


Skýrist á miðvikudaginn

„Þetta er mikið reiðarslag,“ segir Jónína en óvíst er hve margir munu missa vinnuna. Hópuppsagnarferli er farið í gang að sögn forstjórans en upplýst verður á miðvikudag hve margir muni missa vinnuna. 

„Það búast allir við hinu versta á miðvikudaginn,“ segir Jónína. Einhverjum muni bjóðast að vinna í Reykjavík en það henti svo sannarlega ekki öllum. Hvernig eigi einstæð móðir að geta sótt vinnu til Reykjavíkur sem byrjar klukkan sex að morgni. 

„Á hún að leggja af stað klukkan fimm? Hún þarf að bæta tveimur klukkustundum við vinnudaginn í ferðatíma,“ segir Jónína. Þá séu atvinnutækifæri á Akranesi ekki mörg.

„Þetta er mikið reiðarslag,“ segir Jónína sem vill ekki skella skuldinni eingöngu á HB Granda. 

„Hvernig kemur Akraneskaupstaður á móti fyrirtækinu? Greiðir það götu þess?“ segir hún og bendir á umræðu í bænum varðandi vonda lykt sem tengd er hausaverkun í bænum. Sjálf búi hún steinsnar frá verkuninni og finni ekki mikla lykt.

Jónína vakti athygli um allt land fyrir tveimur árum í baráttu fiskverkakvenna á Akranesi fyrir betri kjörum. Hún sló í gegn í myndbandinu Svei'attan sem fékk mikið áhorf.


Bæjarstjóri hefur um nóg að hugsa

„Lyktin er að hrella einhver sex heimili. Það hefur ekki verið hausaþurrkun í marga mánuði. Samt er fólk að kvarta!“

Þá óttist hún þau keðjuverkandi áhrif sem hópuppsögnin hafi. Fólk fari á atvinnuleysisskrá, hafi minna fé á milli handanna sem hafi áhrif á minni verslun. Þá sé ferðamannaiðnaðurinn ekki nógu vel uppbyggður á Akranesi og lítið verði vart við aukningu ferðamanna í bænum.

Sævar Freyr Þráinsson, nýr bæjarstjóri á Akranesi, hafi því um nóg að hugsa nýsestur í stólinn.

„Þótt það sé fallegt veður á Skaganum þá lítur þetta ekki vel út.“ 


Tengdar fréttir




Fleiri fréttir

Sjá meira


×