Rappheimur í sjokki eftir hnífaárás atvinnukrimmans

„Þetta hefur aldrei gerst áður á Íslandi," segir tónlistarmaðurinn Halldór Halldórsson, oftast nefndur Dóri DNA, um hnífaárás Móra þar sem hann reyndi að stinga tónlistarmanninn Erp Eyvindarson síðdegis í dag. Dóri DNA heldur úti rappþættinum Haförninn á Rás 2 og þekkir mjög vel til rapptónlistarheimsins. Spurður hvort árásin í dag eigi sér fordæmi segir hann svo ekki vera.

Magnús Ómarsson, sem gengur undir listamannaheitinu Móri, reyndi í dag að stinga Erp Eyvindarson með hnífi. Aðdragandinn var sá að þeir Erpur hafa verið að kýta í fjölmiðlum. Erpur sagði meðal annars að Móri væri ljómandi gott dæmi um skaðsemi kannabisreykinga en Móri hefur barist ötullega fyrir lögleiðingu kannabis á Íslandi.

Mikill viðbúnaður var vegna árásarinnar.

Það var svo í dag sem þeir áttu að hittast í útvarpsþættinum Harmageddon á X-inu 977. Þar áttu þeir að jafna sakirnar. Flestir stóðu í þeirri trú að kollegarnir myndu eingöngu ræða málin eins og siðaðir menn en Móri virðist ekki hafa verið á þeim nótunum.

Hann mætti í húsakynni útvarpsstöðvarinnar í Skaftahlíð vopnaður hnífi og rafbyssu. Þá var hann með dobermanhund með sér. Móri kom fyrstu á vettvang um klukkan hálf fimm í dag. Erpur kom stuttu síðar.

Þá sauð strax upp úr en Móri lagði til Erps með hnífnum. Öðrum þáttastjórnanda Harmageddons, Frosti Logason, náði að halda aftur að Móra þannig hann náði ekki að stinga tónlistarmanninn. Erpur tók til fótanna og Móri á eftir. Erpi tókst svo að verjast hnífaárásinni með kústskafti sem hann fann.

Móri gaf sig fram klukkan hálf sex.

Stuttu síðar flúði Móri og lögreglan kom á vettvang. Móra var leitað af öllu tiltæku lögregluliði í Reykjavík en gaf sig fram klukkustund síðar. Hann hefur verið kærður fyrir tilraun til manndráps.

Að sögn Dóra DNA þá er þetta í fyrsta skiptið sem svona átök eiga sér stað á Íslandi. Slíkt er þó ekki óalgengt út í Bandaríkjunum en þar hafa rapparar meðal annars verið myrtir í slíkum deilum. Skemmst er að minnast tónlistarmannsins Tupaq Shakur sem var skotinn á tíunda áratugnum.

Spurður hvort Íslendingar megi búast við harðnandi átökum í rappheiminum segir Dóri DNA: „Bandaríkin eru svo stór markaður og allt umdeilt selur. Það á ekki við hérna."

Dóri segir íslenska rapptónlistarmenn mjög brugðið að heyra af árásinni.

„Rappheimurinn er bara í sjokki," segir hann. Aðspurður hvort svona árás kalli á hefnd eins og í Bandaríkjunum segir hann svo alls ekki vera. Hann segir að málið eigi að fara sína leið í dómsmálakerfinu.

„Ég meina, við erum bara fullorðnir menn í vinnu og námi. Við getum ekki staðið í svona kjaftæði," segir Dóri um árásina.

Erpur Eyvindarson hefur kært Móra fyrir morðtilraun.

Athygli vekur að Móri hefur gert mikið úr glæpaiðkun í texta laganna sinna. Meðal annars heitir eitt lagið Atvinnukrimmi. Þar segist hann hafa þurft að dúsa í steininum en ætli aldrei að láta ná sér á lífi aftur. Spurður hvort Móri sé ekki bara einlægur í því sem hann gerir segir Dóri:

„Þetta atvik gefur kolvitlausa hugmynd um rappheiminn."

Hann bætir svo við að rokkheimurinn hafi farið verr út úr slíkum árásum á Íslandi heldur en rappheimurinn.

Þáttur Dóra, Haförninn, verður á miðnætti á morgun en þar verður málið tekið fyrir að sögn Dóra. Hann segist hafa samið leikrit um atvikið sem verður frumflutt í þættinum. Þá mun hann fjalla ítarlega um málið að auki.

Þá ætlar hann að spila lög beggja aðila en Erpur samdi meðal annars lagið Burðadýr um Móra að sögn Dóra DNA.

Þá er spurning hvort lagið Atvinnukrimmi fái ekki að hljóma einnig en þar má finna þessa setningu: „Ef þú fokkar í mér þá munt þú aldrei fá frið því ég gef aldrei grið."

Sem hljóta að vera nokkuð slæmar fréttir fyrir Erp.