Enski boltinn

Ranieri tilbúinn að selja Mahrez í sumar

Kristinn Páll Teitsson skrifar
Mahrez fær hér skipanir frá Ranieri í leik með Leicester í haust.
Mahrez fær hér skipanir frá Ranieri í leik með Leicester í haust. Vísir/Getty
Claudio Ranieri, knattspyrnustjóri Leicester City, segist ekki ætla að halda neinum leikmönnum gegn þeirra vilja þegar félagsskiptaglugginn verður opnaður í sumar.

Leicester City hefur komið öllum á óvart og er liðið með tveggja stiga forskot á toppi ensku úrvalsdeildarinnar þegar tólf umferðir eru eftir.

Hafa leikmenn á borð við Riyad Mahrez og Jamie Vardy slegið í gegn í vetur og hafa þeir verið orðaður við ýmis stórlið í Evrópu undanfarna mánuði.

Ranieri segist þó ekki vera hræddur við að henda mönnum á bekkinn ef þeir gleymi sér að hugsa út í meintan áhuga annarra liða.

„Ef Riyad heldur áfram spila vel þá vel ég hann áfram í liðið en ef hann fer að hugsa út í önnur lið kemur hann á bekkinn með mér. Ég sagði honum að einbeita sér að því að spila sem best og þá munu stórlið hafa samband í sumar,“ sagði Ranieri sem ætlar ekki að halda leikmönnum gegn þeirra vilja.

„Við viljum halda öllum okkar leikmönnum en ef leikmaður kemur til mín og biður félagið um að samþykkja tilboð frá öðru félagi því það sé skref upp á við mun ég þakka þeim leikmanni fyrir þjónustuna og óska honum góðs gengis.“




Fleiri fréttir

Sjá meira


×