Viðskipti innlent

Rafrænar undirritanir orðnar að veruleika

Nanna Elísa Jakobsdóttir skrifar
Gestur G. Gestsson, forstjóri Advania, telur rafrænar undirskriftir geta breytt daglegu lífi Íslendinga.
Gestur G. Gestsson, forstjóri Advania, telur rafrænar undirskriftir geta breytt daglegu lífi Íslendinga. Fréttablaðið/Pjetur
Advania hefur sett á markað nýja lausn á vefnum sem kallast Signet en hún gerir einstaklingum og fyrirtækjum mögulegt að undirrita skjöl rafrænt hvar og hvenær sem er. Þetta kemur fram í tilkynningu. „Allt sem þarf er að skjalið sé á PDF formi, að undirritendur séu nettengdir og með rafræn skilríki.”

Gestur G. Gestsson, forstjóri Advania, segir lausnina skapa mikinn ávinning fyrir atvinnulífið. „Með rafrænum undirritunum með Signet geta fyrirtæki stigið stór skref í áttina að því að gera öll samskipti og viðskipti rafræn,“ skrifar hann í tilkynningunni.

Þar er bent á að með rafrænum undirritunum verði engin þörf á að hafa samninga eða önnur mikilvæg skjöl á pappírsformi. „Það má búast við að það verði mun auðveldara og hraðvirkara en áður að ganga frá viðskiptum við þjónustufyrirtæki enda hægt að undirrita skjöl heima við ef svo ber undir. Þetta mun spara mörgum sporin í daglegu amstri.“

Í tilkynningunni kemur fram að skjöl sem má undirrita með þessum hætti séu til dæmis allir almennir samningar, fundargerðir, lánasamningar, eignaskiptayfirlýsingar og kaupmálar.

„Signet nýtir rafræn skilríki frá Auðkenni. Undirritanir sem gerðar eru með Signet standast kröfur laga nr 28/2001 til fullgildra rafrænna undirritana og eru því lagalega séð jafngildar hefðbundinni undirritun með penna. Skjöl sem eru undirrituð með Signet eru með langtíma undirritun, sem þýðir að undirritunin inniheldur vottaða tímasetningu og staðfestingu á að rafrænu skilríkin sem beitt var voru gild þegar undirritunin var framkvæmd. Tímasetning undirritunar og hverjir það eru sem undirrita er vottað. Signet virkar ennfremur þannig að notendur geta aðeins séð sín skjöl.”






Fleiri fréttir

Sjá meira


×