Innlent

Pressustríð: Reynir vill afsökunarbeiðni

Ritstjórar DV kunna illa við að vera bendlaðir við kynferðisbrotamál. Steingrímur Sævarr ritstýrir Pressunni.
Ritstjórar DV kunna illa við að vera bendlaðir við kynferðisbrotamál. Steingrímur Sævarr ritstýrir Pressunni.
„Lögmaður hefur haft samband við þá og búið er að fara fram á afsökunarbeiðni," segir Reynir Traustason, annar ritstjóri DV, en hann hefur krafið fréttavefinn Pressuna um afsökunarbeiðni út af frétt sem vefurinn gerir upp úr grein Vilhjálms H. Vilhjálmssonar, lögmanns, þar sem hann gagnrýnir DV harðlega, en greinin birtist hér á Vísi í morgun.

Það sem fer fyrir brjóstið á ritstjóra DV er fyrirsögn Pressunnar: „Ritstjórar DV flæktir í meint kynferðisbrotamál" - Viðeigandi og réttlátt? Hæstaréttarlögmaður spyr"

Fyrirsögnin, það er að segja fyrri hluti hennar, er tilvitnun í grein Vilhjálms þar sem hann gagnrýnir DV fyrir að skapa óeðlileg hughrif með forsíðum sínum. Þannig skrifar Vilhjálmur:

„Í þessu sambandi má velta því upp hvort ritstjórum DV þætti eftirfarandi fyrirsögn ásamt myndbirtingu á forsíðu víðlesins dagblaðs viðeigandi og réttlát ef þannig háttaði til að ritstjórarnir væru vitni í sakamáli.

Yfirheyrðir. Ritstjórar DV flæktir í meint kynferðisbrotamál."

Aðspurður um grein Vilhjálms svarar Reynir því til að hann geri engar sérstakar athugasemdir við hana. „Villi má gagnrýna okkur eins og hann vill. Hann má auðvitað hafa sína skoðun," segir Reynir og bætir við: „En ég get ómögulega tekið á mig kynferðisbrotamál eins og Pressan leggur málið upp."

Reynir segir Pressuna taka tilvitnun úr greininni úr öllu samhengi og stilla henni með meiðandi hætti upp. Þá bendir Reynir á að í fyrstu útgáfu fréttarinnar, hafi fyrirsögnin verið öðruvísi, þar hafi verið fullyrt að ritstjórarnir væru til rannsóknar vegna kynferðisbrots. Því var svo breytt á vefnum. „En ég á skjáskot af þessu," segir Reynir sem krefur Pressuna um afsökunarbeiðni í gegnum lögmann sinn. Sjálfur á hann ekki í samskiptum við miðilinn.

Spurður hvort Reynir ætli sér að stefna miðlinu fyrir meiðyrði fái hann ekki afsökunarbeiðni, segir Reynir að það þurfi svo bara að skoða það.

Hér má lesa grein Pressunnar.


Tengdar fréttir

Fréttir DV

Á undanförnum árum hefur málssóknum vegna ærumeiðinga og brota gegn friðhelgi einkalífs fjölgað umtalsvert á Íslandi. Ástæðan fyrir þessari aukningu er tvíþætt að mati höfundar. Annars vegar er fólk meðvitaðra um rétt sinn. Hins vegar óvönduð vinnubrögð blaðamanna og ritstjóra hjá tilteknum útgefendum. Tveir útgefendur eru í algjörum sérflokki hvað varðar fjölda málssókna. Það eru Birtíngur útgáfufélag og DV. Umfjöllunin hér á eftir er takmörkuð við þann síðarnefnda.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×