Innlent

Pólskur hjúkrunarfræðingur fær starfsleyfi eftir átta ára baráttu

Fanney Birna Jónsdóttir skrifar
Kári Hólmar Ragnarsson, lögmaður konunnar.
Kári Hólmar Ragnarsson, lögmaður konunnar.
Velferðarráðuneytið hefur gert Landlæknisembættinu að heimila pólskum hjúkrunarfræðingi að starfa sem slíkur.

Konan, sem sótti fyrst um starfsleyfi sem hjúkrunarfræðingur á Íslandi árið 2007, er fædd í Póllandi. Hún lauk námi sem hjúkrunarfræðingur árið 1985 og starfaði sem slíkur í Póllandi í 20 ár.

Þegar konan kom til Íslands sótti hún um starfsleyfi sem sjúkraliði og byggði það á menntun sinni sem hjúkrunarfræðingur.

Starfsleyfi konunnar sem sjúkraliði var gefið út af heilbrigðis- og tryggingamálaráðuneytinu árið 2007. Síðar sama ár sótti hún um starfsleyfi sem hjúkrunarfræðingur.

Niðurstaða Landlæknis, sem síðan var staðfest af velferðarráðuneytinu, byggði á afstöðu hjúkrunarráðs sem taldi konuna ekki uppfylla viðmið um menntunarstig.

Ráðuneytið sendi þau gögn sem konan lagði fram við meðferð málsins til stjórnvalda í Póllandi til að fá frekari skýringar á námi hennar, starfsheiti og viðeigandi vottorðum og hvort þau séu í samræmi við reglur um slík starfsleyfi.

Í svörum frá Póllandi er staðfest að konan uppfylli vitnisburð um formlega menntun og hæfi, sem heimili henni að starfa þar í landi. Hún uppfylli Evrópustaðla um áunnin réttindi og starfsreynslu.

Kári Hólmar Ragnarsson lögmaður konunnar, undrast langa málsmeðferð og vinnubrögðunum. Ekkert hafi breyst í málinu frá byrjun.

„Hún sótti um leyfi frá ráðuneytinu og fékk nei. Hún kærði þá ákvörðun og fékk aftur nei,“ segir Kári. Konan hafi þá ráðið lögmann.

„Eina sem vantaði var að ráðuneytið nýtti sér samevrópskt samskiptakerfi til að spyrja pólsk yfirvöld hvort menntun hennar væri í samræmi við Evróputilskipunina og þau svara bara já.“




Fleiri fréttir

Sjá meira


×